دیجیتال میدیا سپێدە:
بۆچی ئەنجامێن ئاک پارتی دخراب بوون؟
مصعب عبدالعزیز
جارێ ئەڤە هەلبژارتنن و یا ساخلەم ئەڤەیە کو هیچ لایەنەک ژسەرکەفتنا خو پشتراست نەبیت، بەری چەند ساڵا ل دەڤەرا مێرگەسورێ ژمارەکا زۆرا پەزکیڤیا مراربوون، پشتی دویڤچون هاتیە کرن، دیاربوو کو گورگ دکێمن ئەو پەزکیڤیە نارەڤن و غارنادەن، ئێدی تەمبەلیێ گرتبوون ژبەر ڤێ؛ نەخوشی دناڤدا بەڵاڤەببوون، هەلبژارتن دڤێت ئەڤ گورگەبیت، لەوما ئەڤا ل تورکیا رویدای گوپیتکا هوشیاریا مللەتیە.
یا گرێدای ب ئەنجامان دێ ب کورتی چەند خالەکان دیارکەم.
ـ پشتی هەلبژارتنێن سەروکاتی و پەرلەمانی یێن تورکیا ل مایسا 2023، خەلکێ تورکیا چاڤەرێی باشبوونا بارێ دارایی بوون، لێ یا رویدای؛ گرانی زێدەتر لێهات، لیرە زۆر داکەفت، و بارێ دارایی زێدەتر تێکچوو (دارایی نەک ئابوری، چونکی داتایێن ئابورێ تورکیا دیارکەن یا دڤەژاندنێ دا و بەردەوام گەشە دکەت).
ـ خو نێزیکرن ل هندەک وەڵات و حکومەتان مینا مسر و سعودیە و ئیمارات، ب رەنگەکی تەمام بەروڤاژی تەرحا بەری نوکە یا فەرمی یا تورکیا و ئاک پارتیێ بوو، ئەڤ خو نێزیکرنە بەرێخودان بو هاتە کرن کو سەر حسابا دویرکەفتن ژگروپێن ئیسلامیە، و تەنازولاتێن زۆر یێن نەپێدڤی ژلایێ تورکیا بو وان وەڵاتان هاتنە کرن، ئەڤێ پێنگاڤێ تەخەکا زۆر یا دەنگدەرێ ئیسلامی تورەکرن.
ـ هەلویستێ نە ل ئاستێ تورکیا بەرامبەر غەزە، کو تەماما جادا ئیسلامی توشی شوکێ و خەیبەت ئەمەلێ کرن، دیسان ئەڤێ تەخەکا مەزنتر ژیا ئێکێ ژهەلگرێن هزرا ئیسلامی و جەماوەرێ ئاکپارتیێ تورە و بێ هیڤیکرن.
ـ ئەڤ تورەبوون و دویرکەفتنا دەنگدەرێ تورکیا ژئاکپارتی نە یا نوکەیە بتنێ، بەلکەی یا تەراکمی یا چەند ساڵایە، ل هەلبژارتنێن سەروکاتیێ و پەرلەمانی یێن بوری دا دەنگدەرێ تورکیا ب ڤی رەنگێ نوکە ئاک پارتی سزا دەت، لێ ژبەرکو ئەو هەلبژارتنە زێدەتر رەهەندێ سیاسی و سیادینە، دەنگدەرێ تورکیا ژترسا تێکچوونا تەماما سیستەمی ل حالەتێ لادانا ئاکپارتی دەستێ خو لسەر برینێن خو گڤاشت و جارەکا دی دەنگ ب ئاکپارتی دا، لێ هەلبژارتنێن باژێرڤانیێ رەهەندێ خزمەتگوزاریێ زاڵە، دەنگدەری ئەو ترسا هەلبژارتنێن دی نینە ئەگەر ئاک پارتی بهێتە پاشڤەبرن ژی، لەوما بێ دوو دلی ئەوا ل هەلبژارتنێن دی ژی ل دلێ خودا هەلگرتی ب ڤان هەلبژارتنان دەرکر.
یا چاڤدێری بو دهێتە کرن، دێ ئاکپارتی ئەڤێ مەسجا دەنگدەرێ تورکیا چەوا وەرگریت؟ دویڤ ئێکەم گوتارا ئەردوغان یا بەری نیڤ دەمژمێرێ، دبیت ئاک پارتی مەسج ب روهنی وەرگرتبیت، ئەردوغان مللەت خەتابارنەکر، زۆر ب هێمنی تەقەبولکر، و خیتابا ئەردوغان و کارڤەدانا وی زۆر یا هەڤسەنگبوو، بەلکەی ئەنجامێن ئەڤان هەلبژارتنێن باژێرڤانیێ ب ویستگەهەکا وەرچەرخان دانا ژبوی لخو زڤرینێ.
و روژگار دێ دیارکەن کا دێ چەند سەربورێ ژێوەرگرن
