دیجیتال میدیا سپێدە:
حزب و کەساتیێن چەکدار بومبەکا تەوقیتکرینە ل هەرێما کوردستانێ.
پشتی ب دوماهیک هاتنا شەرێ برا کوژیێ دناڤبەرا حزبێن چەکدار ب تایبەت ئێکەتی و پارتی، کوشتنا هزاران کورێن هەژاران و تیرورکرنا سەدان کەساتیێن سیاسی ،ئەمنی، جڤاکی و ئاینی ژ پارتێن سیاسی یێن هەرێمێ ، کو زوورینەیا وان ب دەستێ ئێکەتی و پارتی هاتنە تیرورکرن کو هەژمارەکا زوورا وان ئەندامێن (ئێکەتی و پارتی ) بخوە ژی بین ، هەتا دگەهیتە تیرورکرنا کەساتیێن سیاسی و جڤاکی و ئاینیێن سەربەخۆ و ئۆپزسیونێ ژی ، پشتی ڤان کارەسات و تاوانان ب دەستێ حزبێن چەکدار ل هەرێما کوردستانێ ، وەلاتیان هێڤی دخاستن، ب تایبەت پشتی کەفتا ڕژێما بەعس ل سالا ٢٠٠٣ و ئاڤاکرنا عێراقا نوی ل سالا ٢٠٠٥ ، هاتنا وەلاتێن زلهێز وەکو ئەمریکا و ئەلمانیا و بەریتانیا وهتد،،، بۆ هەرێما کوردستانێ، کو ئەو وەلاتە تا ڕادەیەک باش خودان سیستەمەک دیمۆکراسیێ بهێزن ، ئێدی حزبێن هەرێما کوردستانێ ژوان فێرببن و حکومەت بهێتە سیستەمکرن ، و چەک ژ دەستێ پارت و گروپێن حزبی بهێنە وەرگرتن و هیچ هێزەکا چەکدار ژ دەرڤەی هێزێن حکومەتێ و یاسایێ نەمینت، حکومەتەک بهێتە دروستکرن رێگربیت ل هەبوونا ملیشیاتێن چەکدار ل هەرێما کوردستانێ .
مخابن پشتی بورینا ٣٣ سالان ژ حکومڕانی و دەستهەلاتا پارتی و ئێکەتی، نەک چەک ژدەستێ حزب و گروپان نەئینایەدەر، بەلکۆ بەروڤاژی بۆ پاراستنا بەرژەوەندیێن خوە یێن حزبی و بنەماڵەیی بۆنە پشتەڤانێن بهێز بۆ دروستکرنا حزبێن چەکدار، ل بن سیبەرا دەستهەلاتا پارتی و ئێکەتی ، پێشمەرگە و دەزگەهێن ئەمنی هاتنە حزبیکرن و دادگەهان سەربەخۆیا خوە تاڕادەیەکی بەرچاڤ ژ دەستدا، هەتا هەردوو پارتێن دەستهەلاتدارێن هەرێما کوردستانێ ژبلی حزبان، ئێدی هێزێن چەکدار بۆ ئاغا ودەرەبەگ و بنەمالەیان ژی دروستکرن، داکۆ هەر دەما بەرژەوەندیێن وان کەفتنە د مەترسیێ دا ئەو گروپ و ملیشیایە وان بپارێزن،
بۆ نمۆنە، درستکرنا هێزێن چەکدار و دامەزراندنا وان بۆ کەسێن وەکو حەمەی حاجی محمۆد سکرتێرێ حزبا سوسیال دیمۆکراتا کوردستانێ وەک حزب، و چێکرنا هێزان بۆ ئاغایان وەکو عەبدڵا کوێخا مۆبارەکی وەک کەساتیێ عەشایری ،چەندین نمۆنین دیتر، مەترسی ل سەر دیمۆکراسیەت، ئازادییا ڕادەربرینێ، ئۆپزسیۆنا مەدەنی، خەباتا پەرلەمانی و هەمی خەلکێ دروستکریە، د هەر تەوقیتەکێ دا هەرێما کوردستانێ گونجایە بۆ شەرێ ناڤخوی، کۆشتنا هزارەهان خەلکی، تیرورکرن و ڕەڤاندنا روژنامەڤان وچالاکڤانان، کەسایەتیێن سەربەخۆ و کادرێن ئۆپزسیۆنا مەدەنی ب دەستێ حزب و کەسایەتیێن چەکدار، کو دابینکەرێن چەک و پارێ وان ئێکەتی و پارتی نە،
گەر پارتی و ئێکەتی بڤێت هەرێما کوردستانێ هەرێمەکا بهێز بیت و یاسا تێدا سەروەربیت، دادگەهێن وێ سەربەخۆ بن، رێز ل پەرلەمان و خەباتا مەدەنی بهێتەگرتن، دیمۆکراسیەتا راستەقینە ژدایک ببیت، مێدیا ئازاد و سەربەخو هەبیت، ڕۆژنامەڤان نەهێنە تیرورکرن، بارەگایێن هێزێن مەدەنی و ئۆپزسیۆن نەهێنە سوتن، وەلاتیێن سڤیل نەهێنە کوشتن ، ژن تێدا ئازادبیت، ل سەر ئاستێ نێڤدەولەتی دەستخۆشی لێ بهێتەکرن، وەلاتێن دیمۆکراسیی رەفتارا گەنجای دگەل بکن، ل سەر وان پێدڤیە دنوکەدا هەر ژ حزبێن خوە دەستپێبکن ،چەک ژ دەستێ هەمی حزبان بهێتە دەرئێخستن، هێز و ملیشیاتێن چەکدار یان بهێنە هەلوەشاندن یان ژی بکەڤن ژێر کونترولا حزب ودەزگەهێن فەرمی یێن حکومەتا هەرێمێ دا، ئێدی چەکدار وهێزێن چەکدار بو هیچ بەرپرسەکی یان حزبەکێ یان ئاغایەکی نەهێنە دامەزراندن کو ئەڤە داخازییا هەمی وەلاتێن دوستێن کوردانە ژی،
لێ ئەز وەکو ڕوژنامەڤانەک دماوێ کارێ خوە دا ، ئەز گەهشتیمە ڤێ باوەریێ، چ جاران پارتی و ئێکەتی ئامادە نینن ئەڤا ل سەری من گوتی ئەنجامبدەن، ژبەرکو پاراستنا بەرژەوەندیێن خوە یێن حزبی ژ هەمی تشتەکی گرنگتر دبینن ، نە دیموکراسیەت ، نەمافێ مروڤی و نە ژی چ تشتەک دیتر بۆ وان گرنگ نینە، یا ل دەڤ وان گرنگ چەک، پارە، بازرگانی ، کومپانیا و ژیانا وان و زاروکێن وان یا شاهانەیە ، سەبارەت خەلکی، ئەو هزردکەن خەلک کویلە نە و خۆدێ یێت داین دا خزمەتا کوچک و تەلار و زاروکێن وان بکەت .
