ئەنجامی توێژینەوەیەك كە نزیكەی 86 ساڵی خایاندووە لەبارەی بەختەوەری بڵاوكرایەوەو سەرۆكی پێشووتری ئەمریكاش جۆن كێنێدی بەشداری تیادا كردووە

لە ساڵی ١٩٣٨ەوە واتە نزیکەی ٨٦ ساڵ لەمەوبەر توێژەرانی زانکۆی بەناوبانگی هارڤارد لێکۆڵینەوە لە هۆکارەکانی بەختەوەری دەکەن بۆ ئەوەی وەڵامێک بۆ ئەم پرسیارە بدۆزنەوە: بەڕاستی چی بەختەوەر و دڵخۆشمان دەکات؟
توێژینەوەکە لەسەر هۆکارەکانی دڵخۆشی ئەنجامدراوەو بە درێژایی ئەو ساڵانە سەرجەم چین و توێژە کۆمەڵایەتییەکانی شاری بۆستنی ئەمریكای لەخۆگرتبوو، تەنانەت جۆن کێنێدی سەرۆکی پێشووتری ئەمریکاش بەشداریی تێدا کردووە، بەپێی ئەوەی ماڵپەڕی “فۆکوس”ی ئەڵمانی بڵاویکردووەتەوە.
بە کەڵک وەرگرتن لەو زانیاریانەی کە لە ماوەی ٨٥ ساڵدا کۆکراونەتەوە، ئەو دوو زانایە، (پرۆفیسۆر د.ڕۆبەرت جەی والدینگەر) و هاوکارەکەی (دکتۆر مارک شوڵز)، ئەنجامی توێژینەوەکەیان لە کتێبێکدا بە ناوی (ژیانی باش: وانەکان لە درێژترین لێکۆڵینەوەی زانستی لە جیهاندا لەبارەی بەختەوەرییەوە) بڵاوکردەوە.
گرنگترین ئەنجامی توێژینەوەکە ئەوەیە کە (ناوبانگبوون، پارە، یان بوونی بۆهێڵی باش) مرۆڤ دڵخۆش ناکەن، ئەوەی بەڕاستی گرنگە پەیوەندییە مانادارەکانە. مرۆڤەکان بە سروشت بوونەوەرێکی کۆمەڵایەتین، بۆیە هاوڕێیەتی باش و پەیوەندییەکی باش لەگەڵ خێزان و هاوبەشییەکی مانادار زۆر گرنگن کاتێک باس لە ژیانێکی درێژ و بەختەوەر دەکرێت.
پرۆفیسۆر ڕۆبەرت جەی والدینگەر، سەرۆکی توێژینەوەی گەشەپێدانی پێگەیشتووان لە زانکۆی هارڤارد ڕوونی دەکاتەوە: "دۆزینەوەی سەرسوڕهێنەر ئەوەیە کە پەیوەندییەکانمان کاریگەرییەکی بەهێزیان لەسەر تەندروستیمان هەیە". ڕاستە پەیڕەوکردنی سیستمی خۆراکی هاوسەنگ و تەندروست و وەرزشی گونجاو و خەوتنی باش و ڕێکوپێک بەردی بناغەی ژیانێکی بەختەوەرن، بەڵام پەیوەندییە نزیکەکان ڕۆڵی سەرەکی لەم کارەدا دەبینن، بەگوێرەی ئەوەی کە ماڵپەڕی فۆکۆسی ئەڵمانی بڵاویکردووەتەوە.
والدینگەر ڕوونی دەکاتەوە: گرنگیدان بە جەستەمان گرنگە، بەڵام گرنگیدان بە پەیوەندییەکانمان جۆرێکە لە چاودێریکردنی خۆمان، تەنانەت سەرۆکی تیمی توێژینەوەکە ئەوەندەی گەیاندووە کە "تەنیایی بەقەد جگەرەکێشان یان مەیخواردنەوە کوشندەیە".
بەڵام بە گوتەی والدینگەر ئەنجامی ئەو توێژینەوە ئەوە ناگەیەنێت زۆرترین هاوڕێیەتی و پەیوەندی دروستبكرێت، بەڵكو ئەوەی گرنگە ئەوەیە کە کەسانی نزیکمان هەبێت کە بتوانین پشتیان پێ ببەستین. بۆیە ڕۆبەرت جەی والدینگەر ئامۆژگاری دەکات: هەوڵبدەین زیاتر گرنگی بە پەیوەندییەکانمان بدەین.