دیجیتال میدیا سپێدە:
لدور هێرشێن ئاسمانیێن ئەمریكا بۆ سەر بارەگەهێن حەشدا شەعبی، شیرەتكارێ ئاسایشا نەتەوەییا عیراقێ راگەهاند: ب ئارمانجگرتنا بارەگەهێن حەشدا شەعبی بنپێكاریا سەروەریا عیراقێ یە.
سپێدەهیا ئەڤرو هێزێن ئەمریكا چەند بارەگەهێن حەشدا شەعبی ل هەردوو پارێزگەهێن ئەنبار وبابل بوردوومانكرن، وتێدا كوشتن وبریندار بوونا چەكدارێن حەشدا شەعبی لێ پەیدابویە.
دڤی واریدا، قاسم ئەعرەجی، شیرەتكارێ ئاسایشا نەتەوەییا عیراقێ راگەهاندیە: ب ئارمانجگرتنا بنگەهـ وبارەگەهێن حەشدا شەعبی ل قائیم و جورف سەخر، كریارەكا دوژمنكارانەیە و بنپێكاریا ئاشكرایا سەروەریا عیراقێ یە، و ئەو هێرش رەوشا نافچەیێ سەقامگیر ناكەن، لەورا باشترە ئەمریكا گڤاشتنان بكەت و دوژمنكاریێن لسەر غەززە رابگریت، ل شوینا بهێت بنگەه ودامەزراوێن نیشنیمانی یێن عیراقێ ب ئارمانج بگریت.
هەروەسا ژلایەكێ دیڤە هەر ل پشتی هێرشێ، لۆید ئۆستن، وەزیرێ بەرەڤانیا ئەمریكا راگەهاند: ب فەرمانا سەروكێ وەلاتی جۆ بایدن، هێزێن ئەمریكا سێ بنگەهێن گروپێن میلیشیایێن عیراقی یێن نزیك ل ئیرانێ بوردوومان كرینە.
ئوستن ئەو هێرش ب پێدڤی ورێژەیی بناڤ بر و راگەهاند: ئەو هێرش بەرسڤا راستەوخۆ یا وان زنجیرە هێرشێن میلیشیایێن نزیك ل ئیرانێ یە یێن هێرشا دكەنە سەر بنگەهێن ئەمریكا ل عیراقێ وسوریا.
ئوستن راگەهاند ژی: ژبو پاراستنا بەرژەوەندیێن ئەمریكا ل دەڤەرێ دێ پێنگاڤێن بڤی رەنگی هاڤێژین، وخویاكر: پێكولێ ژی نادەین ژبو زێدەكرنا هەڤڕكی وشەر وپێكدادانان ل نافچەیێ دا، وداخازا راگرتنا دەملدەستا هێرشێن وان گروپان بو سەر هێزێن هەڤپەیمانان ل عیراق وسوریا كر.
