کەزییێن شەنگە بیهـ و دار زەیتونا ژبەر بارانێ تەڕ ببوون ، هێشتا دڵوپێن ئاڤێ ژێ دوەریان ،سڤاندێن ئاخێ بو چیچکا ببوونە سەیوان ، ڕویبارێ گوندێ مە وەکی مارەکێ ئازراندی و بریندار کیفێنا دەنگێ وێ بسەر گوندی دکەفت و هەوار دکر ،ب شێوەکی توڕە ببوو ،هەر تشتەکێ کەتبا بەر دگەل پێلێن خۆ گڕێل دکر ، دار و بەر ڕادمالی ، ملێن ئاڤمالکا پەراڤێن ڕویباری زەفت کربوون ، باروڤا ناخێ منژی پیچەك ژ ڤی ڕویباری دینترە.
شڤێدی چاڤێن منژی دگەل ئەسمانێ ڤی گوندی نەنڤستینە ، هندی عەورا ڕوندك باراندینە ، هناڤێ من خاڤ دبیت وەکو وێ نێرگزا لبەر بارانێ بەژنا وێ خار و خاڤ بووی ،خۆ لسەر پیێن خۆ ناگرم ، ئەڤە ئێکەم سپێدەهە دژیانا مندا دونیا ڕون دبیت و ژیان پشتی شەڤەکا ڕەش و درێژ دوبارە چاڤێن خۆ دپەرخینیت، لێ دوبارە نشتیمانا دەیکا من چاڤێن خۆ تێدا ڤەناکەت ، ئەڤ دیوانا مەزن کو هەمی شەڤان ب دەهان ڕوی سپی و ماقیل و زەڵامێن دەڤەرێ لێ کوم دبن هەمبەری باوەشا دەیکا من بتنێ مستەکە.
سپێدەهەکا زویە ،هەر چەندە باران یا ڕاوستیای لێ هێشتا عەورێن چڕ و تاری نیقابا خۆ لسەر دێم و خەملا بوهارا گوندی هەلنەدایە ، جارنا بریسی ئەنیا کوپیتکێن بلند دسمن قڕقڕێن عەورا گەفا دکەن ، قامچییێن خۆ بناڤ ملێن چیای وەردکەن ، زەڤی یا حەمر بووی ،ئێدی شیانێن مژینا ئاڤێ نینە، وەکو وان زاڕوکێن شیر ژ دفنێن وان دهێت و ئێدی نەشێن مەمکێن دەیکا خۆ بمژن، زەنەک دناڤ زەڤینێن چاندنێ دپەقن ، دلێ منژی تژییە وەکی زگێ وێ کیڤریشکا ئاڤس و لسەر ڕوژێن خۆ ، دلێ منژی خۆ لبەر چ خەمێن دی ناگریت ، لێ باوڕناکەم خەمەك مابیت و من ئەزمون نەکری ، دلێ من هنارەکا تژی و پێگەهشتییە چاڤەڕێ دەستەکی دکەت ب کێرەکی بکەلێشیت و هەمی خەمێن وی داقوتیتە ئامانەکێ برسی.
هەست ب برسیبونێ دکەم لێ فێر نەبویمە بێی دەیکا خۆ بچمە سەر سفرا خوارنێ، وەکو وێ سورەقەتکا د هێلینا خۆ و هەردەم دەڤێ وێ بەش و چاڤەڕێ دەیکا خۆ دمینیت.
خودێ نەکەت ئەگەر هات و دەیکا وێ ببتە نێچیرا مارەکی ، ئەوژی دهێلینا خۆدا دێ بیتە نێچیرێ کرم و کێزان، و هێلینا وێ جهێ ژیان و وەرارێ دێ لێ بیتە گوڕ ، لێ مرنێ دەیکا من هنگاڤت ژیێ من ژ زاڕوکینیێ ڕژاند ، گری بو مانشێتا ژیانا من ، دەرسوکا دەیکا من بو ئاڵایێ نشتیمانا من.
