وەزارەتی بازرگانی عێراق هەڵگرتنی مۆڵەتی هاوردەكردنی سێ كەرەستەی بنەڕەتی ڕاگەیاند و دوپاتیكردەوە، 100 دۆلار بە 132 هەزار دینار دەدرێتە بەو بازرگانانەی كە خۆراك لەدەرەوەی وڵاتەوە هاوردە دەكەن.
موسەنا فەریجی وتەبێژی وەزارەتی بازرگانی عێراق رایگەیاند، وەزیری بازرگانی بڕیاریداوە بە كردنەوەی حەوت سەنتەری نوێی بازرگانی لە ماوەی شەش مانگی داهاتودا، بەمەش ژمارەكە دەگاتە 15 سەنتەری بازرگانی لە سەرجەم پارێزگاكان، تا كۆتایی ساڵی 2024یشدا، كۆی گشتی سەنتەرەكان دەگەیەندرێنە 30 سەنتەری بازرگانی ئاست بەرز كە سەرجەمیان پشت بە سیستەمی ئەلیكترۆنی (باركۆد) دەبەستن بۆ فرۆشتن.
وتەبێژەكەی وەازرەتی بازرگانی گوتیشی، وەزیری بازرگانی رێنمایی دەركردوە كە هەر بابەتێك كە نرخەكەی بەرزبێتەوە، راستەوخۆ هاوردەكردنی دەستپێدەكات بەمەبەستی دروستكردنی هاوسەنگی لە بازاڕەكان.
وتەبێژی وەزارەتی بازرگانی دوپاتیكردەوە كە وەزارەتەكەیان سنورداركردنی مۆڵەتی هاوردەكردنی بۆ ئەو كەسانە هەڵگرتوە كە دەیانەوێت كەرەستەی خۆراك و كارەبایی یان دەرمانسازی هاوردە بكەن، هەروەها پلاتفۆرمی بانكی ناوەندی بۆ هەموان بەردەستە، ئەوەشی ئاشكراكرد، 100 دۆلار بۆ هاوردەكارانی خۆراك بە 132 هەزار دینار هەژمار دەكرێت.
باسی لەوەشكرد، زیادكردنی نرخی خۆراك و كەلوپەل لەلایەن بازرگانەوە ناڕەوایە و پێویستە دۆخ و گوزەرانی هاوڵاتیان لەبەرچاو بگرن و خۆیان لەو تەماحە دور بخەنەوە كە هەندێكیان دەیانەوێت دوجار قازانج بكەن، جارێك لە جیاوازییەكە لە نرخی دۆلار و جارێكیش لە نرخی فرۆشتنی كەلوپەل و خۆراكەكان لەبازاڕەكان.
