دیجیتال میدیا سپێدە:
بهەلكەفتا هاتنا سەرێ سالا 1446ێ مشەختی، ئەمیندارێ گشتیێ یەكگرتووی ئیسلامی كوردستان پەیامەكا پیروزباهیێ بەلاڤ دكەت.
دپەیامەكێدا ماموستا سەلاحەدین محمد بهائەدین ئەمیندارێ گشتیێ یەكگرتوو رادگەهینیت: هاتنا سالڤەگەرا مشەختبوونا سەروەرێ مە محمد سلاڤ لسەربن، سەرێ سالا مشەختی 1446ێ ل ئوممەتا ئیسلامێ و هەموو مروڤایەتیێ بگشتی و گەلێ كوردستانێ ب تایبەتی پیروز دكەم، ژخودایێ مەزن دخازم سالا نوی یا مشەختی بكەتە سالا سەركەفتنا گەلێن بن دەست و شكەستنا زلهێز و ستەمكارێن جیهانێ. هەروەكی دخازم ل سالڤەگەرا هەلكەفتا مشەختبوونا پێغەمبەری سلاڤ لسەر بن، زورترین دەرس و عیبرەتان وەرگرین ژ فیداكاریێ و بەختكرنا سەر و مالی ژپێخەمەت پەیاما خودێ و چەسپاندنا عەدالەتێ و دامەزراندنا حوكمێ رەشید و پارێزگاریا مافێن مروڤی و بلند راگرتنا پەیاما راستەقینەیا ئیسلامێ.
ئەمیندارێ گشتیێ یەكگرتوو رادگەهینت: مشەختبوون ب وێ پێنگاڤا مەزن دهێتە دانان، هێلا جوداكرنا دوو قوناغێن جودا و گرنگێن پەیاما خودێ یە بو مروڤایەتیێ، دەستپێكا گهورینەكا مەزن بوو ل هەمی رەهەندێن ژیانێ دا، دەستپێكا دامەزراندنا دەولەتا مەدینە و دەستورێ پێكڤە ژیانا پێكهاتان بوو.
مشەختبوونا پێغەمبەری و هەڤالێن وی، سەلمێنەرا وێ یەكێ یە كو پێدڤیە عەقیدە و مەبدەئو پەیاما رزگاریا مروڤان ل بەراهیا هەمی تشتەكی بیت، لەورا وەك مروڤ هاتە ئەنجامدان و هەڤ ئاوایێ میعراجێ موعجیزە نەبوو، هەتا هەمی موسلمانەك بەرهەڤ بیت ئەنجام بدەت و هەژی دووبارە كرنێ بیت.
ئەمیندارێ گشتی خویاكریە: هیڤیدارین سالا نوی یا مشەختی سالا سەركەفتنا گەلێ زولم لێكریێ فەلەستینێ بیت بسەر داگیركەرێن زاروك و سڤیل كوژراندا، سالا مشەختبوونێ بیت ژ كوێلایەتی و پاشكویەتیێ، بەزین بیت بو سەربلندی و سەركەفتن و چالاكی و خزمەتێ.
