دیجیتال میدیا سپێدە:
بریكارێ گشتیێ نەتەوێن ئێكگرتی ژبو كاروبارێن مروڤی و رێكخەرێ هاریكاریێن بلەز، مارتن گریفیس راگەهاند: 16 ملیون و 700 هزار كەسان ل سوریا، پێدڤی ب هاریكاریێن مروڤی هەیە.
مارتن گریفیس لدەمێ رونشتنا جڤاتا ئاسایشا نێڤدەولەتی لدور رەوشا سوریا راگەهاند: ئەو ئەردهژێن ل 6ی شوباتا 2023 ل پارێزگەها قەهرەمان مەڕەش یا باشورێ توركیا رویدای، دژوارترین بوردومان بویە لدەمێ سەدەیەكێ دا ل جیهانێ دا هاتیە رویدان و خویاكریە: ژبەر وێ كارەساتێ هزاران كەس ل توركیا وسوریا گیانێن خو ژدەست دان.
راگەهاند ژی: كاریگەریا وان ئەردهژان ل سوریا زور زێدەتر بویە، ئەڤە ژی ژبەر وان هەڤڕكیێن زێدەتری 12 سالانە ل سوریا بەردەوامن و گوت: سوریا پێدڤی ب دووبارە ئاڤاكرنێ هەیە ب تایبەتی ژی ل رویێ ژێرخانا خزمەتگوزاریێن دەستپێكی و جهێن ئاكنجیبوونێ.
ئاماژە كریە: لدەمێ سالا رابوری وەرە، رەوشا سوریا خرابتر بویە، دنوكە دا 16 ملیون و 700 هزار كەسان ل سوریا پێدڤی ب هاریكاریێن مرۆڤی هەیە ئەڤە ژی ئێكسانە ب سێ لسەر چوار یا سەرجەمێ ئاكنجیێن سوریا.
گریفیس دبێژیت ژی: بەردەوامیا هەڤڕكیێن سوریا، بویە جهێ كێمبونا دابینكرنا ئاڤ وخزمەتگوزاریێن دەستپێكی، هەروەسا خرابتر بوونا رەوشا ئابوریا ڤی وەلاتی، وگوت: دووبارە داخازێ ل سەرجەم لایەنێن پەیوەندیدار دكەم رێزێ ل یاسا مروڤی یا نێڤدەولەتی بگرن.