ديجيتال میدیا سپیدە:
پێكهاتە و لایەنێن كەركوكێ بو پێكئینانا حكومەتا خوجهی، گەهشتنە رێككەفتنەكا دەستپێكی، پوستێن سەرەكی ژی دناڤبەرا خودا دابەشكرینە.
روژا چوار شەمبیا رابوری پێكهاتە و لایەن ب نوێنەراتیا سەركردێن خو كو سەركەفتیێن هەلبژارتنان بوون ل جڤاتا پارێزگەها كەركوكێ، دگەل محمد شیاع سودانی سەروك وەزیران كومبوون، رەوشا كەركوكێ و پێكئینانا حكومەتا خوجهیا وی باژاری گوتوبێژكر.
لدور رێككەفتنێ، كو میدیایێن سەرب ئێكەتی بەلاڤكرینە، پوستێ پارێزگارێ كەركوكێ بو ئێكەتیێ یە، سەروكێ جڤاتا پارێزگەهێ ژی بو لایەنێن عەرەبی یە. قایمقامێ ناڤەندی ژی بو توركمانایە، هەروەسا جێگرێن پارێزگاری بو پارتی و لایەنێن عەرەبی یە، بریاردەرێ جڤاتا پارێزگەهێ ژی دێ بو توركمانان بیت.
ل كومبونا لایەنێن كەركوكێ دگەل سودانی، موهلەتا 7 روژان دایە بو پێشكێشكرنا داخازیا لایەنێن سەركەفتیێن كەركوكێ ب مەرەما پێكئینانا حكومەتا خوجهی.
جڤاتا پارێزگەها كەركوكێ ل 15 ئەندامێن گشتی و ئێك ئەندامێ كوتا پێكهاتیە. پشتی 16ێ ئوكتوبەرا 2017ێ پوستێ پارێزگاری كەفتیە دەست پێكهاتا عەرەبی و هەتا نوكە ب وەكالەت ئەو پوست دهێتە رێڤەبرن. پتریا پوستان ژی ژ لایەنێن كوردی هاتینەڤ وەرگرتن.
