دیجیتال میدیا سپێده:
بۆ گه‌هشتن ب رێككه‌فتنێ لسه‌ر چوارچووڤه‌یێ ستراتیژى یا په‌یوه‌ندىا دناڤبه‌را واندا، ئه‌ڤرۆ عێراق و ئه‌مریكا دێ دانوستاندنا ستراتیژی یا دناڤبه‌را واندا ده‌ستپێكه‌ن.
ل ده‌ستپێكا ئه‌ڤساڵه و پشتی كوشتنا قاسم سلێمانى فه‌رمانده‌یێ فه‌یله‌قا قودس ژلایێ ئه‌مریكا ڤه ل به‌غدا، په‌رله‌مانێ عێراقێ بریاره‌ك ده‌ركر بۆ ده‌ۆئێخستنا هێزێن بیانی ل عێراقێ كو زێده‌تر مه‌ره‌ما وان هێزێن ئه‌مریكا بوویه، كو ئه‌ڤ بریارا په‌رله‌مانێ عێراقێ داوی ئینان بووه ب رێككه‌فتنا ئه‌منى یا ستراتیژى یا ساڵا 2008ێ دناڤبه‌را هه‌ردوو وه‌ڵاتان،كو لگوره‌ی ئه‌ڤێ رێككه‌فتنێ هه‌بوونا هێزێن ئه‌مریكى ل عێراقێ یا رێكخستی بوو.
د دانوستانێن ئه‌ڤرۆ دا، به‌غدا و واشنتۆن رێككه‌فتنه‌كا دیتر ئه‌نجام د ده‌ن،بۆ رێكخستنا هه‌بوونا هێزێن ئه‌مریكى لسه‌ر ئاخا عێراقێ،هه‌رچه‌ند میلیشیا وگروپێن چه‌كدارێن شیعى دژى هه‌بوونا چ هێزه‌كا ئه‌مریكینه، شاندێ عێراقى نێزیكێ 10 كه‌سان پێكدهێت،كو زۆربه‌یا وان سه‌ر ب لایه‌نێن سیاسى و پێكهاته‌یانه،كو سه‌رۆكێ دیوانا سه‌رۆكاتیا هه‌رێما كوردستانێ ئێك ژ ئه‌ندامێن شاندێ عێراقینه، و ژ شاندێ ئه‌مریكی شه‌ش كه‌س به‌شدارن ب سه‌رۆكاتیا دیڤید هێل جێگرێ وه‌زیرێ ده‌رڤه‌یێ ئه‌مریكا.
