دیجیتال میدیا سپێده:
پەیڤدارێ لژنا بەرهەڤیێن كونگرێ گوتوبێژێن نیشتیمانیا سوریا راگەهاندیە: دانوستان دنووكە دا ل چوارچوڤێ بەرهەڤیان بەردەوامە ل پێخەمەت ئەنجامدانا ئێكەم كونگرە بناڤێ "خەون وسەركەفتن" ب بەشداریا گەلێ سوریا.
حەسەن دەغیم، پەیڤدارێ لیژنا بەرهەڤیێن كونگرێ دانوستانێن نیشتیمانیێ سوریا راگەهاندیە: پشتی سەدەیەكی ژبندەستی و زولم و زورداریا رژێما ئەسەدی، سوریا دێ ئێكەم كونگرێ خەون وسەركەفتنێ ب بەشداریا گەلێ سوری وپێكهاتێن وێ ئەنجامدەت.
دەغیم راگەهاند ژی: سوری بخو دێ گوتوبێژا رەوشا وەلاتێ خو ل تەڤایا بیاڤاندا كەن، ب بەشداریا كەسانێن شارەزا وپسپور ل نافخو ودەرڤەی سوریا دا.
ئاماژەكریە: پشتی ئەنجامدانا هەلبژارتنان ودەركرنا یاسا حزبان، ئوپوزسیونەكا جودا ژی دێ هەبیت، وئەڤە ژی كارەكێ سروشتیە وسوریا نابیتە دەولەتا ئێك حزب.
ئەو دانوستان وگوتوبێژێن ل پارێزگەها حومسێ برێڤەچووین، دەغیم دبێژیت: بەرهەڤبوویێن وێ لایەنێن جودا بوون، ل تەڤایا پێكهاتە وئاییانان بوو، دگەل بەشداریكرنا بەشەك ژ رێكخراوێن كومەلگەهێ مەدەنی برێڤەچوو.
ل 12ی شوباتا ئەڤ سالە ئەحمەد شەرع سەروك كومارێ سوریا فەرماندایە ب پێكئینانا لیژنەیەكا بەرهەڤیان ژبو گرێدانا ئێكەمین كونگرێ دانوستانێن نشتیمانی ب بەشداریا تەڤایا پێكهاتە ولایەنێن سوریا ودێ بیتە بەرێ بناغێ ژبو دروستكرنا ناسنامەیا سیاسی ژبو پاشەروژا سوریا.
