دیجیتال میدیا سپێده:
تا نوكە چارەنڤیسێ سێ موچێن دوماهیا ئەڤ سالە یێن موچەخورێن هەرێمێ دیار نینە و دەمێ زێدەتری 60 روژانە ژی موچەخور د چاڤەرێیا موچێ هەیڤا 10 دانە.
هەرچەندە حكومەتا عیراقێ گوژمەكێ پارەی ژبو هەرێمێ رەوانەكریە، لێ حكومەتا دەم بسەرڤەچویی بەرهەڤ نینە وی گوژمی وەربگریت و ب داهاتێن نافخویی كورتئینانێ پڕ بكەت و لیستا موچەی بەلاڤ بكەت.
ل روژانێن رابوری وەزارەتا داراییا عیراقێ گوژمێ 761 ملیار دیناران ژبو هەرێما كوردستانێ رەوانەكریە، لێ جڤاتا وەزیرێن هەرێمێ هایداری دایە وەزارەتا دارایی وئابووری وی گوژمێ پارەی وەرنەگریت هەتا بەغدا بڕەكا دی ژپارەی رەوانە بكەت داكو كورتئینان پڕ ببیت و دەستكاریا داهاتێ نافخو نەهێتە كرن.
وەزارەتا دارایی و ئابوریا هەرێمێ ژی ئەڤرو بەلاڤكریە: لیستا موچێ هەیڤا 12 رەوانەی وەزارەتا داراییا عیراقێ كریە، بڤێ ژی ب هنارتنا لیستا موچێ هەیڤا 12، دنوكە دا لیستێن هەر سێ هەیڤێن 10 و 11 و12 گەهشتینە بەغدا، لێ تا نوكە هیچ ژوان نەهاتینە دابەشكرن.
دەمێ زێدەتری دوو هەیڤانە موچە ل هەرێما كوردستانێ نەهاتیە دابەشكرن، ڤێ ژی ژیانا موچەخوران دژوار كریە و تا نوكە ژی چارەنڤیسێ موچێ هەیڤێن 10 و 11 و 12 دیار نینە.
