دیجیتال میدیا سپێده:
پەیڤدارێ فەرمیێ حكومەتا عیراقێ راگەهاند: وەلاتێ مە دەستوەردانا سەربازی ل رەوشا نوكە یا سوریا دا ناكەت و دگەل ئێكرێزیا ئاخا سوریا داینە.
باسم عەوادی پەیڤدارێ حكومەتا عیراقێ دبەلاڤنامەكێ دا راگەهاند: عیراق دگەل ئێكرێزیا ئاخا سوریا دایە و رەتدكەین ئێكرێزیا ڤی وەلاتی تێكبچیت و گەلێ سوریا زێدەتر بكەڤیتە دناڤ ئاستەنگی وئازارێن زێدەتر دا.
راگەهاند ژی: عیراق پێكولا وێ یەكێ نادەت دەستوەردانا سەربازی ل رەوشا نوكە یا سوریا دا بكەت وگوت: حكومەتا عیراقی ژی پێكولێن سیاسی ودیبلوماسی ددەت ژبو ڤەدیتنا چارەسەریەكێ ژبو قەیرانا سوریا.
عەوادی ئاماژەكر: ئەوا ل سوریا دهێتە رویدان، پەیوەندی ب ئاسایشا نەتەوەیی یا عیراقێ ڤە هەیە وگوت: دابەشكرنا ئاخا سوریا ژبو عیراقێ هێلا سوورە.
هەڤپەیمانیا ئیدارەدانا دەولەتێ ل عیراقێ، پێشنیارەك ئاراستە كریە بناڤێ دەست پێشخەرییا عیراقی ژبو بانگەوازا وەلاتێن هەڤسێ و پەیوەندیدار ب رەوشا سوریا هەتا ل بەغدا كومببن.
