دیجیتال میدیا سپێده:
هێرشێن دەستەیا تەحریر شام و گروپێن چەكدارێن هەڤپەیمانێن وێ بو سەر حەلەب بەردەوامن. روانگەها سوری بو مافێن مروڤی ژی رادگەهینیت: هەتا نوكە شیاینە زێدەتری نیڤا حەلەب كونترول بكەن.
رامی عەبدولرەحمان رێڤەبەرێ روانگەها سوری بو مافێن مروڤی راگەهاندیە: دنوكەدا زێدەتری نیڤا حەلەب لژێر كونترولا ئوپوزسیونێ دایە، سوپایێ سوریا ژی ل بەشەكێ باژارێ خوڤەكێشایە، هەموو ئەو رێكێن دچنە وی باژاری داخستینە.
ژێدەرەكێ سەربازی ب ئاژانسا رویتەرز راگەهاندیە: حكومەتا سوریا فروكەخانا باژاری داخستیە و هەموو گەشت ژی هەلوەشاندینە.
ئەڤە ئێكەمینجارە ل سالا 2016ێ وەرە هێرشەكا بڤی رەنگیا مەزن ژلایێ گروپێن چەكدار بهێتەكرن بو سەر دووەم مەزنترین باژارێ سوریا، پشتی كو ل وێ سالێدا پشتی هێرشا دژوار یا حكومەتا سوریا ب پشتەڤانیا رووسیا، ئیران، گروپێن چەكدارێن هەڤپەیمانێن دەستەیا تەحریر شام و گروپێن چەكدارێن دیێن توركیا پشتەڤانیێ لێ دكەت ل تاخێن روژهەلاتا باژارێ دەركرین.
سپێدەهیا ئەڤرو ژی ئوپوزسیونا سوریا ل درێژاهیا پێشڤەچوناندا بەرەڤ ئیدلب، 50 گوند ژدەستێ هێزێن رژێما ئەسەدی كونترولكرینەڤە.
لدور روانگەها سوری بو مافێن مروڤی، ل سێیەم روژا ئالوزیاندا ئوپوزسیونێ 108 خال و كومەلگەهەكا ئاكنجیبونێ ل پارێزگەها حەلەب و ئیدلب كونترولكرنەڤە، بڤی ئەگەری زێدەتری 242 سڤیل و سەرباز و چەكدار هاتنە كوشتن.
