دیجیتال میدیا سپێده:
ئاشێ پارتى - پشكا (2)ـێ
پشتی هێرانا گورانێ ژ لایێ ئاشێ حكۆمەتا پارتیڤە دێ بەحسێ ..
یەکگرتووى ئیسلامى کۆردستان كین:
ل هەلبژارتنێن خۆڵا (چارێ) یا پەرلەمانێ کۆردستانێ یێن ساڵا (2013)، یەکگرتوویێ (10) کورسێن پەرلەمانى ب دەستڤەئیناتن، ب ڕێژەیا نێزیکى (10%) پشتى شیای (186,741) سەد و هەشتێ و شەش هزار و حەفت سەد و چل و ئێک دەنگێن زەڵال و پاقژ سەرەڕاى هەمى سختەکارى و خەرقێن قانۆنى و سەرپێچیێن دژى دیموکراسیێ هاتینە کرن ب دەستڤە بینتن.
بەلێ کارەسات ئەو بوو: پشتى پشکدارى ل گەل پارتى کرى و سەرەڕاى پارێزەرییا وێ ل سەر پرۆژەیێن ویێن چاکسازى، کو زۆر جاران پارتى تەحەمولا وێ نەدکر، دگۆتێ: پییەک یێ تە یێ ل گەل مە و پیێ دن یێ ل گەل ئوپۆزسیۆنێ، ئەم ڤێ قەبیل ناکین، لێ ب ڕاستى ئاشێ پارتى شیا پتر ژ نیڤا هێزا یەکگرتوویێ بهێرت، تەماشە بکە:
پشتى چار پێنج ساڵێن پشکداریێ د حکۆمەتێدا، یەکگرتوو و بزاڤا ئیسلامى و هندەک سازى و کەسایەتییا پێکڤە د ئێک هەڤپەیماندا یا ب ناڤێ (بەرەڤ ئیسلاح) پشکدارى د هەلبژارتنێن خۆڵا (پێنجێ) یا پەرلەمانى کرن، لێ هەمییا پێکڤە تەنها (5,21%) ژ دەنگان ب دەست خستن، ژمارەیا دەنگێن ڤێ هەڤپەیمانێ خڕێ ب تنێ: (79,912) حەفتێ و نەهـ هزار و نەهـ سەد و دوازدە دەنگ بوون، و بەرهەمێ تەڤان (5) کورسىێن پەرلەمانى بۆ یەکگرتوویێ چوون!
باش بوو، ئەقلەک ژ سەربۆڕان هاتە وەرگرتن، سەرکێشێن یەکگرتوویێ خوە ژ کۆدەلا ئاشێ پارتى دویر خستن، هەتا وى ڕادەى دەمى شەڕێ پڕەنسیپ و بنەمایان خواستى یەکگرتوویێ هەمى کلیلێت هەر (25) پۆستێن حکۆمەتا خۆجهییا دهۆکێ ژى هاڤێتنە بەر پارتى، ما وەکۆ ئوپۆزسیۆنەکا ڕاستەقینە د پەرلەمانیدا. بزاڤ کر، ب ڤێ چەندێ شییا دوو جۆرێن دەستکەفتییان بەرهەم بهینت:
ئێک:
ببتن بەربەستەکا ب هێز هەمبەر هەوڵێن حەلاندن و ژ ناڤبرنا ناسنامەیا ئاینى، و چەپەرەک ل د ژى گەندەڵیێ.
دوو:
دەنگ و کورسیێن خوە ژى چەندەکێ زێدە بکت، و پچەکێ برینێن خوە دەرمان بکت ئەوێن ژ ئەنجامێن پشکدارییا د حکۆمەتا پارتیدا ب سەرێ وێ هاتین.
ئەو بوو د هەلبژارتنێن 20-10-2024، نێزیکى (120) هزار دەنگ ب دەستڤە یەکگرتووڤە هاتن، واتە زێدەترى (40) هزار دەنگان ژ خۆڵا چووى ژ دەنگێن وێ ب هەڤپەیمانیێن وێڕە ژى ئەڤێن مە بەحس کرین شیا زێدە بکت، دوو کورسیی ژى لێ زێ زێدە بوون، ژ (5) کرە (7) ژ سەرجەمێ (95) کورسیێن پەرلەمانى.
هەر چەندە، بۆ یەکگرتوویێ کێمە، وەکى ڕۆژنامەڤانەکێ پارتى گۆتى: "لەمتۆڕێن یەکگرتووخوازان شۆڕن"، خۆدێ جوامێرى ڕاست دبێژت، ئەو دزانت ئەگەر ژى چنە، لێ هەر چەوان بت، ئەم ژ هێرانا کۆشتنێ مینا یا تەڤگەڕا (گۆڕان) کەفتییە د کۆدەلا ئاشێ پارتى دا چەندەکێ ڤەدەر بوون و کۆدکا ڤاڵا نەکەفتە د ڵەپێن یەکگرتووى ئیسلامى کوردستاندا.
لەوا ئەز ژ بنێ پییان دکەمە هەوار، دکەمە گازى، دکەمە فیغان، دکەمە قێڕى ل یەکگرتوویێن ئیسلامخوازێن چاکساز: هوین تازەنە خوە نێزیکى کۆدەلا ئاشى نەکن، و (لا یلدغ المۆمن من جحر مرتین- ئیماندار ژ یەک کونێ قەت دوو جاران ب ویڤە ناهێتە دان).
د دەرفەتەكا دیتردا دێ بەحسێ سەدەم و ئەگەرێن ڤێ دیاردەیا (هێرانێ) كین، ب ئاناهیا خودێ دئ ژ بۆ هەر لایەنەكێ و تەڤ جەمسەرەكێ: خۆیەتی و بابەتێ، ناڤخوی و دەرڤە; فاكتەر و هۆكارێن وان ڤەگەڕینن.
