ئاشێ پارتى - پشكا ئێكێ

دیجیتال میدیا سپێده‌:

ئاشێ پارتى - پشكا (1)ـێ

ئەڤە هەلبژارتن خەلاس بوون و هەر لایەنەکێ چ کێم چ زێدە بەهرا خوە ژ دەنگێن جەماوەرى درین، دەمێ هێرانێ هات، یان بەرەڤ ئاشێ دەستهەڵاتێ بچن مینا هەر جار یان نە، یا دیارە ئاش یێ پارتییە ئاشڤانێن وێ ژى زۆر شەهرەزا و پسپۆرن و دهێرانێدا بخودێ هیچ تەخسیری نەکرینە و باوەرناکم بکن ژى، بەلێ د نەدهێرانا دەنگان ب تنێدا بەلکى د هێرانا کومکارێن دەنگاندا ژى، مەرەم هێرانا لایەنێن سیاسی، ئەو چەوا؟

کەرەمکن کورتە چیڕۆکا ئاشى ل گەل مە بخوینن و ببینن:

گەلەک دیاردەیێن سیاسى ل کۆردستانێ هەنە، لێ یا ژ هەمیا مەزنتر- یا دهان ساڵە بەردەوام دبت - ئەڤەیە: هەر لایەنەکێ پشکداریێ ل گەل پارتى بکتن، هەڤپەیمانیێ ب وێڕا پێکبهینتن، وەزارەتا وەربگرت و هەتا بگەهت پۆستێ کەسێ دووێ د حکومەتێدا ژى، پشتى دەمەکێ دێ بینى ئاشى ئەو هێرا، خوە ئێک لایەنێ پشکدار ژ ڤێ هێرانێ قورتال نەبییە و د خەیالدا ژى باوەرناکم قورتال ببت، چ مەزن بت، یان ژى بچویک بت، خودان پێگەهەکێ جیۆسیاسیێ ئەمنیێ لەشکەرى بتن – مینا (یەکێتیێ) – یان ژى بزاڤەکا مەدەنییا پێ چەک و سوپا بتن وەکى (یەکگرتوویێ)، یان هەتا خودان بەگڕەوەندەکا خەباتا چەکدارییا شۆرەشگێرى بت وەکى تەڤگەڕا (گۆڕان).

پێخەمەت نەدرێژکرنێ دێ بەحسێ بزاڤا (گۆڕان) و (یەکگرتوویێ) ب تنێ کم، هەر چەندە گەلەک ژ حالێ (یەکێتیێ) ژ ئەنجامێ هێرانێ خوەیایە:

بزاڤا گۆڕان:

ل هەلبژارتنێن خۆڵا (سیێ) یا پەرلەمانێ کۆردستانێ/ ساڵا (2009) هاتینە ئەنجامدان، کو ئێکەم جار بوو ئەڤێ تەڤگەڕێ پشکدارى د دهەلبژارتنێن گشتیدا کری، شییا چارێکا کورسیێن پەرلەمانى ب دەست خوە پێختن ڤەدەرى کورسیێن کۆتا، (25) ئەندام پەرلەمان ب سەرکەفتن، ب ڕێژەیا (24.66%) پشتى شیای (445,024) چار سەد و چل و پێنج هزار و بیست و چار دەنگ ب دەست خستین، وى دەمى ڕۆناکبیر و سەرکێشێ مەزن دامەزرێنەرێ ڤێ تەڤگەڕێ (نەوشێروان مستەڤاى) ئاڵایی گهۆڕینێ بلندکربوو، ل جیهانێ بەڵاڤ ببوو یێ بلدۆزەرا کۆڕانکارییا حوکمێ جۆت ماڵیێ دهاژۆتتن.

و ل خۆڵا (چارێ) یا ل ساڵا (2013) هاتییە کرن هەمان بزاڤ شیا (24) پەرلەمانتاران ب سەربێخت، ب ڕێژەیا (24.68%) پشتى کارى (476,736) چار سەد و حەفتێ شەش هزار و حەفت سەد و سیهـ و شەش دەنگا بیتن.

لێ دەمێ هەلویستێ وێ هەمبەر دەستهەڵاتێ سست بووى و دامەزرینەرێ وێ وەغەرا داویی کرى ل ساڵا 2017، کوڕان ژۆردە ب هێز بەرەڤ خوارێ هات، ل خۆڵا (پێنجێ) ساڵا (2018) تەنها (12) کورى ب دەستڤە ئینان، ب ڕێژەیا (12,18%) و ژمارەیا دەنگێن وێ بۆ (186,903) سەد هەشتێ و شەش هزار و نەهـ سەد و سێ دەنگان هاتنە خوار.

بەلێ دەربێ کوژەک ئەو بوو دەمێ چوویە د ئاشتێ دەستهەڵاتا پارتیدا و بەشدارى د کابینەیا (نەهێ)ـدا کرى ل ڕۆژا ١٠ی تەممووزا ساڵا (٢٠١٩)، پشتى پێنج ساڵ و سێ هەیڤان پارتى هێرا و هێرا هەتا کۆدکا ڤاڵا کریە د ڵەپێ وێدا و نێزیکێ سفرێ بوو و تەنها (1) کورسییا پەرڵەمانى د هەلبژارتنێن بەرى چەند ڕۆەژەکان هاتینە ئەنجامدان ل 20-10-2024 ب دەستڤە هات، باوەر دکم ئێدێ ب زەحمەتە ڕابتن سەرخۆ، هەر چەندە ئەز وەکۆ وەڵاتییەکێ کۆرد هیڤیخوازم سەر ژنوى ڕابتن سەرپیێن خۆ.

پشكا (2)ـێ دێ ل دۆر هێرانا یەكگرتوویێ بتن دەمێ پشكداری د حكۆمەتا پارتیدا كری