پاشمایەکێ ئەنفالێ و سورەتا ( الانفال )

دیجیتال میدیا سپێدە:

پاشمایەکێ ئەنفالێ و سورەتا ( الانفال )

پاشمایێ ئەنفالێ : باپیر ئەفرو ئەز گەهشتمە سورەتەکا نوی ژ قورئانێ لێ ناڤێ وێ بو من یێ سەیر بوو !!!

باپیر : تو گەهشتیە کیژ سورەتێ ؟ و بوچی ناڤێ وێ یێ سەیر بوو ؟

پاشمایێ ئەنفالێ : ئەز کەهشتمە سورەتەکێ ناڤێ وێ ( ئەنفالە ) وەکی وی ناڤێ ب درێژاهیا ژیێ من وەکی کابوسەکێ رەش د هزرا مندا هاتیەچاندن

ئەرێ باپیر ما هەڤبەشیەک هەیە دناڤبەرا ڤێ سورەتێ و ڤی کارێ هاتیەکرن دا ؟

باپیر : ئاخ ئاخ کورێ من نەواللە ئەرد و ئەسمانا ژێک ددویرن لێ دوژمنێن مە وەختێ دوژمناتیا مە هەلبژارتی بریار دا کو ژ هەمی لایانڤە دژایەتیا مە بکەن و کا چاوا ژناڤبرن و کوشتنا مە ئارمانجا وانا بو وەسا نەهێلانا بها و پیروزیان ژی ئارمانجەکا دیتر بوو کاچاوا دویرئێخستنا مە ژ وار و وەڵاتێ مە حەز و ڤیانا وانا بو وەسا دویر ئێخستن و لادانا مە ژ دین و رەوشتێ مەژی هیڤی و داخازا وانا بوون ،

لەوما وان دڤیا ب ڤێ رێکێ یا وان دڤێت بکەن و دینێ مە لبەر جاڤێن مە نەشرین و کرێت بکەن رابوون هندەک ناڤێن ئاینی و پیروز دانانە سەر تاوان و گونەهباریێن خو یێن وان ئەنجام ددان ژبوو دوو مەرەما

1- داکو مە وەک مللەت وەسا تێبگەهینن کو ئەڤا ئەم دگەل هەوە دکەین تشتەکێ رەوایە و دینێ مە ئەڤ رێکە یا دایە مە د ئەنجامدا مە ژ دینی لادەن و لدەف مە بکەنە تشتەکێ کێم

2- داکو لدەف مللەتێ خو کو ئەوژی هەر موسڵمانن رەوایەتیێ بدەنە کارێ خو یێ چەپەڵ و ب ڤان ناڤێن پیروز کارێن خو یێن کرێت جوان بکەن

پاشمایێ ئەنفالێ : باپیر ئەرێ چ زانا و مەڵا و ماموستا و وژدان ساخ دناڤ واندا نەبوون نەرەوایەتیا ئەڤی کاری بو وان دیاربکەن ؟

باپیر : کورێ من زانا و مەڵایێن وان ژی هەر وەکی ب درێژیا دیروکێ ببونە دوو بەش بەشەک ژبو پاراستنا خو و بەرژەوەندیێن خو ب تەمامی چوبونە پاڵ دەسهەڵاتێ و رەوایی ددا هەر کارەکێ دەسهەڵاتێ ئەنجام دابا و ب مخابنی ڤە ئەڤ جورە رێژا زورێنەبوون ، و بەشەکێ دی ب دژی ڤان کارا رادبوون د ئەنجامدا چارەنڤیسێ وان گرتن و کوشتن یان دویرئێخستن بوو .

پ.ئە : دەمێ ئەز گەهشتیمە سورەتا ئەنفال ئەز درامانا وێ نەگەهشتم ئەرێ دێ شێی ب تێر و تەسەلی بو من شروڤەکەی ؟

باپیر : کورێ من ( ئەنفال ) ئانکو ئەو کەل و پەل و ماڵ و مولکن یێن د گورەپانا شەری دا بێ باوەران بجهـ دهێلن و دکەڤنە ددەستێ موسلمانا دا .

پ، ئە: باپیر لێ ئەم نە بێ باوەر بوین و ئەم د شەری ژی دا نەبوین و وانا نەبتنێ کەل و پەلێن مە برن بەلکی ب دەهان گەنج و لاو و زاروک و ئافرەت کوشتن !

باپیر : بەلێ کورێ من هەر وەکی بەری بێهنەکێ من ئاماژە پێدای کو مەرەما دەسهەڵاتێ گەلەک یا پیس و کرێت بوو ژ بناڤ کرنا ڤێ هەوێ ب ناڤێ ( ئەنفال ) .

پ . ئە: باپیر دناڤ وی خەلکێ هاتیە گرتن و کوشتن دا زاروک هەبوون و ئافرەت هەبوون و دانعەمر و نەساخ و پەککەفتی هەبوون ، هەروەکی من د سیرەتا پێغەمبەری دا ( سلاڤ لسەر بن ) خواندی گەلەک رێنما و بریار دهاتنە دان بو ڤان جورە کەسان هەر چەندە ئەڤ کەسە بێ باوەر ژی بن ؟

باپیر : کورێ من رێک و رێبازا پێغەمبەری( سلاڤ لسەر بن ) یا ل نهاڵەکێ و ئەنجامدەرێن ڤی کاری یێن ل نهاڵەکا دی هیچ پەیوەندیەک ب ئێک و دوو ڤە نینە هەر چەندە ب روخسار خو ب دویکەفتیێن وێ رێبازێ ژی د زانن لێ دەمێ پێغەمبەری ( سلاڤ لسەر بن ) هەڤاڵێن خو فرێدکرنە جهەکی ژبو بەرسینگگرتنا بێ باوەرا دا وانا هشیارکەت و هندەک فەرمانا لێکەت و بێژیتێ :

[ هشیار بن چ زاروکا نەکوژن ، چ پیرەمێرا نە کوژن ، چ ئافرەتا نە کوژن ، دێ هندەک کەسا بینن د کوخێن خوڤە مژیلی عیبادەتێ خونە دەستێ خو درێژ نەکەنە وان ، هشیار بن زیانێ نە گەهیننە مەر و ماڵات و پەزێ خەلکێ ، چ رێکا خراب نەکەن ، چ داران نەبڕن ] .

پێغەمبەری ( سلاڤ لسەر بن )بیرا وان ل پەیاما ئیسلامێ د ئینا کو هەمی ئاشتی و بڕایەتی یە .

لێ کورێ من پەنجامدەرێن ڤێ کومکوژیا بسەرێ مللەتێ مەدا هاتی گەلەک کارێن دویر ژ رەوشتێ پێغەمبەری ( سلاڤ لسەر بن ) ئەنجام دان .

- گهورینا رامانا ئایەتێن قورئانێ و ب کارئینانا وان بو بەرژەوەندیا خوو .

- کوشتنا زاروک و دانعەمر و ئافرەت و پەککەفتیا.

- سوتن و کاڤل کرنا زێدەتر ژ 5 هزار گوندا .

- هەر گوندەک ژ وان مزگەفتەک لێ هەبوو و هەر مزگەفتەک ژوان ب دەهان قورئان و پەرتوکێن ئاینی لێ هەبوون زوربەیا وان هاتنە سوتن .

- تاڵان و دزی و پیچکرنا سەروەت و سامانێ خەلکی و سوتنا دەروبارێن وان.

- تا وی راددەی ل گەلەک جهان رابوون ب حشک کرنا کانیێن ئاڤێ .

- و د ئەنجامدا 182 هزار کەس هاتنە شەهیدکرن .

کورێ من ئەڤە بوو کارێ دەسهەڵاتێ ژبەر هندێ چ گومان تێدا نینە کو دوژمنێن سەرەکی یێن رێبازا پیروزا ئیسلامێ ئەو بوون .

پ. ئە: باپیر پا بوچی هەتا نوکەژی هندەک ژ مللەتێ مە ڤی کاری ددەنە پاڵ ئیسلامێ و دبێژن ب ناڤێ ئیسلامێ ئەڤ کارە یێ هاتیەکرن ؟

باپیر : ب راستی ئەو کەسێن ڤێ ئاخفتنێ دبێژن چ ژوان کێمتر نینن یێن ئەڤ کارە ئەنجام دای چونکی ئێک ژ مەرەم و مەبەست و هیڤیا ئەنجامدەرێن ڤی کاری ئها ئەڤ چەندەبوو کو ڤێ هزرێ بکەنە د سەرێ مەدا ،( هەر چەندە مەرەما وان یا سەرەکی سیاسی بوو )

و ئەو کەسێن د ناڤ مەبخودا ڤێ دهوڵێ د قوتن ژ لایەنێ هزر و بیرا فە درێژەپێدەر و قوتابیێن وانن و سەر ب ئێک قوتابخانا هزری ڤەنە و ئارمانجا هەردووا کێمکرن و نەهێلانا کارتێکرنا دینی یە لسەر مللەتێ مە .

پ. ئە : باپیر سوز بیت ئەز ب درستی خو د رامانا ( ئەنفال ) بگەهینم و بو هەڤاڵێت خو شروڤەکەم .

باپیر : بژیت کورێ من ، نابیت دوژمن دوو جارا مروڤی ب کوژیت و نابیت دزیکەر دوو جارا دزیێ ژ مروڤی بکەت .