دیجیتال میدیا سپێدە:
رێكخراوا ئۆنرا سەر ب نەتەوێن ئێكگرتی راگەهاند: ل پشتی 7ی ئوكتوبەرا رابوری تا نوكە دهێرشێن سوپایێ زایونی دا بو سەر كەرتێ غەززە 885 كارمەندێن ساخلەمیێ و 289 كارمەندێن هاریكاریێن مروڤی هاتینە شەهید كرن.
فلیپ لازارینی، كومسیارێ گشتیێ ئاژانسا نەتەوێن ئێكگرتی بو هاریكاری و كاروبارێن پەنابەرێن فەلەستینی "ئۆنروا" بهەلكەفتا روژا جیهانیا هاریكاریێن مروڤی راگەهاندیە: ل غەززە تەڤایا یاسایێن نوكە یێن شەڕی هاتینە بنپێكرن و پێدڤیە بەرپرسیارێن ڤی شەری ڤەپێچین دگەل دا بێتە كرن.
لازارینی خویاكریە: ژئەنجامێ وان هێرشێن ئیسرائیل ل پشتی 7ی ئوكتوبەرا رابوری تا نوكە بو سەر كەرتێ غەززە ئەنجامددەت 885 كارمەندێن ساخلەمیێ و 289 كارمەندێن هاریكاریێن مروڤی هاتینە شەهید كرن، 207 كارمەند ژی سەر ب ئونروانە و پتریا وان ژی لدەمێ كاركرنێ دا ژلایێ سوپایێ زایونی هاتینە ب ئارمانج گرتن.
هەروەسا لازارینی خویاكریە: تا نوكە ژی 169 روژنامەڤان هاتینە شەهید كرن، سوپایێ زایونی ئەڤرو ژی روژنامەڤانەك لدەمێ رومالكرنێ دا ب راستەوخۆ شەهید كریە.
وەزارەتا ساخلەمیا فەلەستین ل كەرتێ غەززە راگەهاندیە: ل پشتی 7ی ئوكتوبەرا رابوری تا نوكە 40 هزار و 139 فەلەستینی شەهید بوینە، 16 هزار و 314 ژوان زاروكن، و 10 هزار و 980 ژی ژنن.
