بەراستى ئەوە نەرویج بوو؟ سەیرە

23/11/2019 - 14:21 نشر في وتار

رەزوان زەڵمی

ـ لە دوێنێوە بیر لەوە دەکەمەوە، بەراستى ئەوە نەرویج بوو کە سوتاندنى قورئانى پیرۆز تیایدا وەکو چالاکى رێکخرابوو، بۆ تەماشەکردن؟! بەراستى نیشانەیەکى پرسیار بەس نییە بۆ ئەمە، بەڵکو نیشانەیەکى سەرسورمانى دەوێت درێژییەکەى ئێرە تا نەرویژ بێت.

ـ ئاخر ئێمە وامان بیستووەو وامان دیوە کە وڵاتانى ئەوروپى لەسەرووى هەموویانەوە بەریتانیاو فەرەنساو نەرویج و سوید ..هتد لانکەى مافى مرۆڤ و دیموکراسى بن.. کەچى ئەوەى روویدا شتێکى نامۆو سەیر بوو... سەیرتر لەسەیر.!

ـ نەرویج، مەلا کرێکار داڵدە دەدات بە بیانووى پاراستنى ماف و شعورو ئازادى کەسى.. کەچى لەلایەکى دیکەوە رێگە دەدات سوکایەتى بکرێت بە شعورو پیرۆزى ملیۆنان کەس..! سەیرە.

ـ لەوەش سەیرتر، نەرویج لەم کاتەدا چى داوە لەم سەرئێشەو شەڕفرۆشتنە؟ لەکاتێکدا داعش هێشتا زۆرێک لە ئەندام و شانە نوستووەکان لەشەرق و غەرب تەراتێن دەکەن و بەدواى هەلێکدا دەگەرێن بتەقنەوە..سەیرە

ـ لەهەمووى سەیرتر، بەراستى ئەو چالاکوان و رۆشنبیرو رۆژنامەنوسانەى لاى خۆمانن، لەبەر ئەوەى کە نازانن چۆن قسە لەسەر بابەتەکە بکەن، بێدەنگ بوون.. چونکە ناتوانن پشتگیرى ئەو گەنجە بکەن کە لەسەر ئایینەکەى، قورئان سوتاندنى پێ قبوڵ نەکرا، ناشوێرن بە ئاشکرا پشتگیرى نەرویج بکەن کە چۆن رێگە ئەدات بە سوتاندنى قورئان.! بەڵام لانى کەم دەتوانن ئەو پرسیارە بکەن بەراستى ئەوە نەرویجەکەى ئەوان بوو؟ وەڵا سەیرە..!