دیجیتال میدیا سپێدە:
عاشورا نەمانا ستەمکاریێ، عاشۆڕا هاتنا ستەمکاریێ!!
گەلۆ دەربڕینێ ژ خۆشى و شادیێ بکین، یان ژ کۆڤان کەسەران ؟!
ل ڤێ ڕۆژێ (10 موحەڕەمێ) بەریا هزارەها ساڵان خۆدایێ عالەمێ دویماهى ب ستەما فیرعەونى ئینا و مۆسایێ کەلیم(سڵاڤ لێ بن) و خەلکێ وى ژ زولم و زۆرییەکا مەزن قورتال کرن.
لێ یا جەرگبڕ: پشتى بوورینا دەهان چەرخان هەر د ڤێ ڕۆژێدا ژ ساڵا (61 مش) بەرامبەر(680ز) مەزنترین زولم و مەرگەسات د مێژوویا ئێسلامێدا ڕویدا، حوکمڕانیەکا ب شێوازێ فیرعەونیێ زاڵم ل ناڤ موسلمانان هاتە ڕاچاندن.
ل عاشۆڕائا (61 مش) خراپترین دەربوەشاندەکا کارەساتبار ب ئومەتا ئیسلامێ کەڤت، برینەکا کویرا کویر هەتا ڤێ گاڤێ یان خوینڕێژ ل جەرگێ ئەمەتێ ڤەبوو، باوەرناکم هەتا ڕۆژا هەڵامەتێ ساڕێژ ببت، د دەمێ شۆرەشا حەقیيا حوسەینێ نەڤیێ پێغەمبەرى (سڵاڤ لێ بن) ل سەر دەستێ وى فاسق و زاڵمێ دگۆتنێ (یەزید) هاتییە ڤەمراندن، (حوسەینێ کوڕێ ئیمام عەلى) و چەندین کەس ژ ماڵباتا وى ب دەستێن زۆرداران و ب وەحشیگەرى و هۆڤانە هاتینە ژ ناڤبرن، ئەو گەردەنا دەلالا حوسەینى یا چەندین جاران پێغەمبەرێ خۆدێ ماچى کری، ئەو گەردەن ب دەستەکێ ستەمکار و پیس هاتە بڕین و سەرێ ویێ پیرۆز ژ عیراقێ بۆ یەزیدى ل شامێ وەکۆ دیارى ڤڕێ کرن، ولا حول ولا قوة إلا بالله!
وەکى ڤێ ڕۆژێ حوکمێ ژیرانە و ڕەشید و شێوەرمەندى ئەوێ خۆداى د قورئانا پیرۆزدا فەرزکرى ((وأمرهم شورى بینهم)) و ((وشاورهم فی الأمر)) زاڵمان ل دیواریدا و ئەو حوکمێ کیسڕەویێ پاشایی، یێ خۆپەڕێسیێ ماڵباتپەڕێسى، ئەوێ چ بەڵگە ژ دەڤ خۆدێ پێ نەهەى ((ما أنزل الله بها من سلطان)) هاتە سەپاندن و بەرقەڕار بوو.
ل ڤێ ڕۆژێ هۆسان بەرێ بنیاتا پیسترین بیدعەیا سیاسى یا مالوێرانکەر هاتە ڕاچاندن، و ب فەتوایێن زانایێن کۆچکا حاکمى (عاظ السلاطين) تەلارێ وێ مینا ئەهڕامێن مسرێ هاتە بلندکرن و قایمکرن.
ب ڤى ئاوایى چەکا ڕەوابوون و شەرعییەتا گەهشتنا حوکمى ب کۆدەتا و ب زۆرى و بخوینێ و دیسان بەردەوامییا وێ ب دکتاتۆرى و ب (ئاسن وئاگرى) ژ بۆ چەپەڵترین مەخلۆقان ل سەر سێنییەکا زێڕى ب وەربادانا فێهما (وأولي الأمر منكم) هاتە پێشکێش کرن.
دیسان ل وێ ڕۆژێ کارتا سۆڕا حەڕامبۆن یا خەوارجییێ بۆ هەر هەوڵەکا ڕزگاریخوازى و ئازادبوونا ژ کۆڵەتییا کۆڵەداران هاتە بلندکرن، و هندەک زانایێت ئاینێ ئیسلامێ ئازادیخوازییا مینا یا (حوسەینى) سەردارێ گەنجێن بهەشتێ (سید شباب أهل الجنة ب دەقێ گۆتنا پێغەمبەرى سڵاڤ لێ بن) ب کریارا نژدەڤان و تاڵانچییان (قطاع طرق) ب ناڤ دکن، ڤێجا خوە بلا ئەو بزاڤە ژبۆ بەرجەستەکرنا شەریعەتێ خۆدێ و نەهێلانا بەدڕەوشتى و گاورى و فجۆرێ ژى بت، هەر ل دەڤ وان مەژى ژەنگى و پاشڤەڕۆیان هەمان حوکم هەیە.
ل وى دەمێ وەسا بەرێ خوە ددن حەقخوازان ژ کەس و کۆم و کومەڵێن دلسۆزێن بانگخواز و ئیسلامخوازان یێن کەڤن، یێن نوى هەر وەکۆ (خەوارج)ـن، د هەمان دەمدا حاکمێت تاوانکار مینا یەزیدێ ستەمکار یێ چەندین زانايێن سەلەفان ب فاسق و فاجر و مەیڤەخۆر ناسکری و هەتا بگەهییە دەستهەڵاتدارێن دکتاتۆر یێن ڤى سەردەمى ئەوێ ل سەرپشتا تانکەر و زریپۆشان دەستهەڵاتدارى وەرگرتین و حوکمەکێ ویڕاسیێ باب و کوڕان ب ڕێڤە دبن ئەڤان حوکمداران ب (وەلى ئەمرێ شەرعى) دزانن، تاعەت و دویڤچوونا وان ب ئەرک دیار دکن.
ژ وێ ڕۆژێ ژ (10 موحوڕەما 61 مشەختى 10 ئوکتۆبەرا 680ز) و هەتا ڤێ گاڤێ هەڤچڕین و لەتکرن و ژێکڤەبوون د لاشێ ئومەتا ئیسلامێدا یا کویر و مەزن و بەردەوامە، بەس خۆدێ دزانت دێ کەنکى ملیارێن موسلمان ژێ قورتاڵبن.
لەوا ل ڤێ ڕۆژێ ل(عاشۆرایێ) موسلمانێ هوشیار نزانت بکەنت یان ژى بگریت.
ئاگەهداربە: من بەحسێ وى موسلمانى نینە ئەوێ ژ لایێ زانایێت سەراى و کۆکچکان هاتییە ئەفیۆنکرن، ئەلبەتە سەرێ وى گرتییە!
هەر چ حالێ هەبت ئیماندار دڤێت کەسەکێ ئەرینى بت، لەوا خێرا گرتنا ڤێ ڕۆژێ وەکۆ ڕۆژا سەرکەفتنا حەقیێ و شکەستنا فیرعەونیێ یا مەزنە، وەکى پێغەمبەرى سڵاڤ لێ بن ئەم فێر کرین.
