ھێزە ئەمنییەکانی عێراق ھەڵمەتێکی فراوانی گەڕان و پشکنینیان، بە ئامانجی دەستگیرکردنی کەسانی داواکراو و هەڵگرتنی زێدەڕۆییەکان لە ناوچەی بەتاوین ڕۆژھەڵاتی بەغدا، دەستپێکردووە.
وەزارەتی ناوخۆی عێراق لە ڕاگەیاندراوێکدا ئاماژەی بەوەداوە کە بەرەبەیانی ئەمڕۆ پێنجشەممە، ھەڵمەتێکی گەڕان و پشکنین، لەلایەن ھێزە ئەمنییەکانەوە بۆسەر شوێنە گومانلێکراوەکان لە ناوچەی بەتاوین ڕۆژھەڵاتی بەغدا، دەست پێکراوە.
ڕاشیگەیاندووە کە ھەڵمەتەکە، بەسەرپەرشتی مەیدانی وەزیری ناوخۆی عێراق، عەبدولئەمیر شممەری بە بەشداری ھێزە ھاوبەشەکان لە سوپا و پۆلیس، بەڕێوە دەچێت.
بەپێی ڕاگەیاندراوەکە، عەبدولئەمیر شممەری لەبارەی ھەڵمەتەکەدا، ڕایگەیاندووە کە ھێزەکانی سەربە فەرماندەیی ئۆپەراسیۆنەکانی ڕەسافە و ھێزەکانی سەربە فەرماندەیی پۆلسی ڕەسافە لە ھەڵمەتەکەدا، بەشدارن.
وەزیری ناوخۆی عێراق باسی لەوەش کردووە کە ھەڵمەتەکە، ١٠ ڕۆژ بەردەوام دەبێت.
ھاوکات وەزارەتی ناوخۆی عێراق، چەند فۆتو و گرتەیەکی ڤیدیۆیی لەبارەی دەستپێکردنی ھەڵمەتەکە، بڵاوکردووەتەوە و ڕایگەیاندووە کە لە میانی ھەڵمەتەکەدا، ژمارەیەک کەسی داواکراو دەستگیرکراون و ھەندێک زێدەرۆییش لە ناوچەکەدا هەڵگیراون.
