بەگوێرەی ئامارە حكوومەییەكان، لەماوەی ساڵی 2022 تا 2024دا 200 حاڵەتی خۆكوشتن لە پارێزگای زیقار تۆمار كراون، كە 52 لەو حاڵەتانە بە خۆخنكاندن و حاڵەتەكانی دیكەش بە، خۆسووتاندن، گولـلە و ژەهر خواردن بووە، زۆرینەی خۆكوژەكانیش لە چینی گەنجان بوون.
ڕێكخراوەكانی كۆمەڵگەی مەدەنی پارێزگاكە، ئامارەكانی حكوومەت بە ناڕاست وەسف دەكەن و دەڵێن: بەڵكو ئامارەكانی خۆكوشتن لە شارەكە، زۆر لەو ڕێژەیە زیاترە كە حكوومەت بڵاویان دەكاتەوە، جەخت دەكەنەوە كە لە ماوەی ئەم دوو ساڵەدا سەروو 400 حاڵەتی خۆكوشتن هەبووە.
لەلای خۆیەوە ڕێكخراوی پەیوەندی و برایەتی مرۆیی لە پارێزگای زیقار، هۆكاری سەرەكی خۆكوشتنی دانیشتووانی زیقار بۆ، هەژاری و بێكاری و توندوتیژی خێزانی و ماددە هۆشبەرەكان دەگەڕێنێتەوە.
بەگوێرەی ئاماری وەزارەتی پلان دانانیش، لە سەدا 48ی دانیشتووانی پارێزگای زیقار لەژێر هێڵی هەژاریدا دەژین و زیاتر لە 100 هەزار كەس لەو پارێزگایە بێكارن.
