چەند ناوچەیەکی کەرتی غەززە لەلایەن سوپای ئیسرائیلەوە بۆردومان کران و لە ئاکامدا، ژمارەیەک فەڵەستینی شههید و برینداربوون.
ماوەی پێنج مانگە ھێرش و بۆردومانەکانی سوپای ئیسرائیل بۆسەر کەرتی غەززە بەردەوامن.
سەرچاوە پزیشکی و شایەتحاڵەکان بە ئاژانسی ئانادۆڵیان ڕایگەیاند کە فڕۆکە جەنگییەکانی ئیسرائیل، خانوویەکیان لە باشووری شاری غەززە بۆردومان کردووە و لە ئاکامدا، سێ کەس شههیدبوون.
ئاماژەیان بەوەشدا کە خانوویەک لە ڕۆژھەڵاتی شاری غەززە، لەلایەن فڕۆکە جەنگییەکانی ئیسرائیل بۆردومان کراوە و بەھۆیەوە، کەسێک شههید بووه و ژمارەیەکی دیکەش برینداربوون.
ھەروەھا شایەتحاڵەکان بۆ ئاژانسی ئانادۆڵ باسیان لەوە کرد کە ھاوکات لەگەڵ بۆردومانکردنی گەڕەکی زەیتون باشووری ڕۆژھەڵاتی شاری غەززە، شەڕ و پێکدادانی سەخت لەنێوان گرووپە چەکدارە فەڵەستینییەکان و سوپای ئیسرائیل لە باشووری ڕۆژھەڵاتی گەڕەکی زەیتون ڕوویداوە.
ھاوکات سەرچاوە پزیشکییەکان بە ئاژانسی ئانادۆڵیان ڕاگەیاند کە فڕۆکە جەنگییەکانی ئیسرائیل خانوویەکیان لە شارۆچکەی بەیت لاھیا باکووری کەرتی غەززە بۆردومان کردووە و لە ئاکامدا، ژمارەیەک فەڵەستینی شههیدبوون..
