كۆمسیۆنی باڵای هه‌ڵبژاردنه‌كانی عێراق ڕایگه‌یاند: بۆ ئه‌نجامدانى هه‌ڵبژاردنی په‌رله‌مانی كوردستان تائێستا هیچ واده‌یه‌ك دیاری نه‌كراوه، هه‌رچه‌نده زۆرینه‌ی ئاماده‌كارییه‌كانی هه‌ڵبژاردنی په‌رله‌مانی هه‌رێم له‌لایه‌ن كۆمسیۆنه‌وه ته‌واوكراون.
عیماد جه‌میل وته‌بێژی كۆمسیۆنی هه‌ڵبژاردنه‌كانی عێراق ڕایگه‌یاندووه: زۆرینه‌ی ئاماده‌كارییه‌كانی هه‌ڵبژاردنی په‌رله‌مانی كوردستان له‌لایه‌ن كۆمسیۆنه‌وه ته‌واوكراون وله‌ئێستاشدا به‌رده‌وامین له‌ته‌واوكردنی ئاماده‌كارییه‌كانی دیكه بۆ ئه‌و هه‌ڵبژاردنه.
جه‌میل راشیگه‌یاند: پێویستمان به‌چوار مانگه بۆ ئه‌نجامدانی هه‌ڵبژاردنی په‌رله‌مانی هه‌رێم و له‌مانگی حوزه‌یراندا ده‌توانین پرۆسه‌كه به‌ڕێوه ببه‌ین، هه‌روه‌ها، دواكه‌وتنی ئه‌و واده‌یه‌شی به‌گرفت ناوبرد.
له‌باره‌ى كاتی به‌ڕێوه‌چوونی هه‌ڵبژاردنه‌كه وته‌بێژی كۆمسیۆنى عێراق ئاماژه‌ى به‌وه‌كرد: پێشبینیش ده‌كه‌ین له‌نیوه‌ی دووه‌می مانگی حوزه‌یران هه‌ڵبژاردنی هه‌رێم به‌ڕێوه‌بچێت، به‌ڵام واده‌كه‌ی له‌لایه‌ن حكومه‌تی كاربه‌رێكه‌ری هه‌رێمه‌وه دیاری ده‌كرێت و ڕاده‌گه‌یه‌ندرێت.
ئه‌وه‌شی خسته‌ڕوو: له‌ئێستادا هیچ واده‌یه‌كی دیاریكراویان له‌به‌رده‌ستدا نییه بۆ ئه‌نجامدانی هه‌ڵبژاردن به‌دیاركراوی، بۆ ئه‌و مه‌به‌سته‌ش چوار مانگیان پێویسته بۆ ئه‌نجامدانی هه‌ڵبژاردن به‌شێوه‌یه‌كی گونجاو.
له‌كاتێكدا ناوه‌ڕاستی ئه‌م مانگه نوێنه‌ری كۆمسیۆنی هه‌ڵبژاردنه‌كانی عێراق وسه‌رۆكایه‌تی هه‌رێم به‌ئاماده‌بوونی نوێنه‌ری یۆنامی له‌سه‌رۆكایه‌تی هه‌رێم سه‌باره‌ت به‌هه‌ڵبژاردنی په‌رله‌مانی كوردستان كۆبوونه‌وه، ئه‌وه‌یان خسته‌ڕوو كه‌له‌سه‌ره‌تاى مانگى حوزه‌یراندا هه‌ڵبژاردن به‌رێوه‌ده‌چێت.
