دیجیتال میدیا سپێدە:
ل بەشەك ژپارێزگەهێن هەرێمێ بەردەوامیا بایكوتێ زورترین دەم لدەمێ 9 سالێن رابوری دا توماركریە، ژبەر بایكوتێ ژی نزیكی ئێك ملیون قوتابی ل دەرڤەی قوتابخانانە ول هندەك دەڤەران ژی دەمێ 75 روژانە بایكوت بەردەوامە.
ژبەر گیروبوونا موچێ سێ هەیڤان د ئەڤ سالە دا، زێدەتر ژ 58 هزار ماموستا رەتدكەن بچنە هولێن خواندنێ وبایكوت ژی راگەهاندیە، ژمارا روژێن ژدەست چوونا دەوامێ ل پتریا جهان گەهشتیە 66 رۆژان ول قەزا رانیە ژی گەهشتیە 75 رۆژان ب درێژترین دەمێ بایكوتێ دهێتە دانان لدەمێ 9 سالێن رابوری دا، ددەمەكێ دا ل پشتی هاتنا داعش وبەلاڤبوونا كورونایێ سالانە خواندن ب شێوازێ ڤەبڕی بەردەوام بویە.
ژلایێ خوڤە، عوسمان گوڵپی، ئەندامێ جڤاتا ماموستایێن نەرازی بو دەنگێ ئەمریكا راگەهاندیە: بایكوت دێ وەكخو یا بەردەوام بیت ودگەل دژواركرنا گڤاشتنان ژی دێ میكانزمێن بەرهنگاربوونا گڤاشتنان ژی دژوارتر كەین وناچینە ژێر باری هیچ گڤاشتنەكێ دا.
ل پشتی بێهیڤیبوونا وان ل حكومەتا كاربەرێكەر، ماموستایێن نەرازی ل روژا 26ی ڤێ هەیڤێ بو مەرەما گەهاندنا داخازییان ڤیا بچنە بەغدا، لێ ب دەستوەردانێن حكومەتا كاربرێكەرا هەرێمێ وهەماهەنگیا وان دگەل بەغدا، ل بازگەهێن هەرێمێ وپارێزگەهێن عیراقی رێگری ل چوونا ماموستایان كر بچنە بەغدا.
دەمێ 9 سالانە پروسا خواندنێ ل هەرێما كوردستانێ هەر جار جار ڤەبڕین وبایكوت دكەڤیتە تێدا، وبایكوت دهێتە ئەنجامدان، لێ ئەڤ سالە درێژترین دەم توماركریە، و ل سالێن 2016 و 2017 ژی دەمێ بایكوتێ گەهشتبوو 52 روژان، لێ هەتا ئەڤرو ل پتریا دەڤەرا 66 روژە هولێن خواندنێ ب داخستی ماینە و ل رانیە ژی 75 روژە بایكوت یا بەردەوامە ودرێژترین دەم توماركریە.
بەری نوكە ژی چەندینجاران هایداری ژئەگەرێ حساب نەكرنا خواندنا ئەڤ سالە هاتینە دان، لێ ماموستا رژدن ل سەر هەلویستێ خو و دیار ژی نینە حكومەتا كاربەرێكەرا هەرێمێ دێ شیان هەبن موچێ موچەخوران دابین بكەت یان نە.
