ڤیدیۆیه‌كی نوێی ئەو ژنە ئیسرائیلییە، کە لە مانگی ئازاری ساڵی ڕابردووەوە لە عێراق ڕفێندرا، وردەکاری نوێی سەبارەت بە کارەکەی و ژیانی تایبەتی خۆی نیشاندا.
ئەلیزابێس تسورکۆڤ لە گرتە ڤیدیۆییەکەدا ئاماژەی بەوە کردووە و دەڵێت “تەمەنم ٣٧ ساڵە، ئیسرائیلم بەجێهێشت و چوومە ویلایەتە یەکگرتووەکانی ئەمریکا”.
ئاماژەی بەوەشکردووە، "من لە مۆساد و سی ئای ئەی کارم کردووە"، ئاشکرایکردووە "لە سوریا کاری كردووه بۆ ئەوەی پەیوەندی له نێوان ئیسرائیل و هێزەکانی سوریای دیموکرات دروستبکات".
هەروەها تسورکۆڤ ئاشکرای کردووە کە "لە عێراق لەسەر پرسی ناکۆکی و بەهێزکردنیان و هەماهەنگیکردنی خۆپیشاندانەکانی ئۆکتۆبەر بۆ ئەوەی شەڕی شیعە و شیعە ڕووبدات" کاری کردووە.
تسورکۆڤ شرۆڤەکاری کاروباری ڕۆژهەڵاتی ناوەڕاستە و خوێندکاری دکتۆرایە لە زانکۆی پرینستۆن، بەگوێرەی "تایمز ئۆف ئیسرائیل" لە کۆتایی ساڵی ڕابردوودا بە پاسپۆرتی ڕووسییەوە هاتۆتە ناو عێراق، پێش ئەوەی لە مانگی ئازاری ڕابردوودا دیارنەمێنێت.
حکومەتی عێراق لێکۆڵینەوەیەکی پەیوەست بە ڕووداوی ڕفاندنەکەی کردەوە، بەپێی ئەوەی باسم ئەلعەوادی وتەبێژی حکومەت ڕایگەیاندووە، دوای ئەوەی ئیسرائیل بەغدای بە بەرپرسیار زانی لە سەلامەتی توێژەرەکە.
