وته‌بێژی وه‌زاره‌تی ده‌ره‌وه‌ی عێراق ڕایده‌گه‌یه‌نێت، پێویسته ئه‌نجومه‌نی ئاسایش وكۆمه‌ڵگه‌ی نێوده‌وڵه‌تی به‌رپرسیارێتی بگرنه ئه‌ستۆ و هێرشه دوژمنكاراییه‌كانی ئیسرائیل بۆ سه‌ر خه‌ڵكی غه‌ززه ڕابگرن.
ئه‌حمه‌د سه‌حاف، وته‌بێژی وه‌زاره‌تی ده‌ره‌وه‌ی عێراق رایگه‌یاند: زیاتر له مانگێكه تاوانه‌كانی سوپای ئیسرائیل داگیركار دژی هاوڵاتیانی فه‌ڵه‌ستینی و هێرشه دوباره و ئاشكراكانی بۆ سه‌ر بینا و دامه‌زراوه خزمه‌تگوزارییه‌كان به‌رده‌وامه.
سه‌حاف راشیگه‌یاند: وه‌زاره‌تی ده‌ره‌وه‌ی عێراق به توندترین شێوه سه‌ركۆنه‌ی به‌رده‌وامی پێشێلكردنی سیستماتیكی ده‌سه‌ڵاتی داگیركه‌ری ئیسرائیل ده‌كات بۆ یاسا نێوده‌وڵه‌تییه‌كان، كه پێشێلكارییه‌كی جیددیه به‌رامبه‌ر بڕگه‌كانی یاسای نێوده‌وڵه‌تی و مرۆیی .
ناوبراو ئاماژه‌ى به‌وه‌شكرد: وه‌زاره‌تی ده‌ره‌وه‌ى عێراق بانگه‌وازی خۆی بۆ ئه‌نجومه‌نی ئاسایش و كۆمه‌ڵگه‌ی نێوده‌وڵه‌تی نوێكرده‌وه، بۆئه‌وه‌ی به‌رپرسیارێتی خۆیان بگرنه ئه‌ستۆ و كۆتایی به‌و پێشێلكارییانه‌ی سوپای جوله‌كه‌ی داگیركار بهێنن.
