لیژنەی نەوت وغاز لەپەرلەمانی عێراق رایگەیاند: هیچ رێككەوتنێك لەنێوان بەغدا وهەولێر لەبارەی ژمارەیەك لەبڕگەكانی یاسایی نەوت وغاز نیە وئاماژەی بەوەكرد: لەپێناو هەڵگرتنی ئاستەنگەكان ولێكنزیككردنەوەی دیدگاكان لەبارەی یەكلاكردنەوەی یاساكە چەند لیژنەیەكیان پێكهێناوە.
باسم نەغیمش، ئەندامی لیژنەی نەوت وغاز لەپەرلەمانی عێراق رایگەیاند: وەزارەتی نەوتی عێراق لیژنەیەكی لەنێوخۆی وەزارەتدا پێكهێناوە لەپێناو دووبارە ئامادەكردنەوەی رەشنووسی یاسایی نەوت وغاز بەرێككەوتن لەنێوان حكومەتی ناوەندی وهەرێمی كوردستان دا.
ئاماژەی بەوەشكردوە: هەرچەندە لیژنەكە كارەكانی تەواوكردوە، بەڵام بەشێك لەبڕگەكانی یاساكە پێویستیان بەرێككەوتنی سیاسی نێوان هەولێر وبەغدا هەیە، بەتایبەت ئەوەی تایبەتە بە بەندەكانی 5 و 13 لەیاسایی نەوت وغاز دا.
راشیگەیاند: سەرۆك وەزیران لەگەڵ لیژنە پەیوەندیدارەكە كۆبووەتەوە وهەروەها لەگەڵ بەرپرسانی وەزارەتی نەوت لەهەرێم وبەغداش كۆبووەتەوە ودواتر لیژنەیەكی دیكەی حكومی پێكهێندراوە كەوەزیر وكەسانی یاساناس و راوێژكاران لەخۆ دەگرێت، بۆ ئەوەی چاودێری كارەكان بكەن وبگەن بەلێكتێگەیشتنی كۆتایی ولێكنزیكردنەوەی دیدگاكان.
