دیجیتال میدیا سپێدە:
دكونگرەیەكێ روژنامەڤانیدا، وەزیرێ دارایی یێ حكومەتا كاربرێكەرا هەرێمێ راگەهاند: مە هەیڤانە پێدڤی ب 940 ملیار دیناران هەیە بتنێ ژبو موچەی، لێ بەغدا بتنێ 598 ملیار دیناران رەوانە دكەت، ئەڤە ژی تێرا موچەی ناكەت.
ئاوات جەناب نوری، وەزیرێ داراییێ حكومەتا كاربرێكەرا هەرێمێ راگەهاند: یاسا بودجەی بۆ ئەڤ سالە دوو سالێن بهێت ئاریشێن زور بو هەرێمێ وبەغدا دروستكرینە، وغەدرەكا زور ل كوردان كریە، وگوت: بریاربوو هەیڤانە زێدەتر ژترلیونەك و 300 ملیون دیناران بو هەرێمێ بێنە رەوانەكرن، لێ تا نوكە نەبویە، ب شێوازێ ئینفاقا فیعلی سەرەدەری دگەل هەرێمێ دا هاتیە كرن، ودنوكە دا نەفەقاتێن 15 پارێزگەهان ویێن سیادی لێدەركرینە وئەوا دمینیت ژی زەڕبی 12 پۆینت 62 دكەن وبەغدا دبێژیتە هەرێمێ ئەڤە حەقێ هەوەیە.
ئاوات جەناب نوری گوت ژی: هەمی هەیڤان بتنێ بو موچەی مە پێدڤی ب 940 ملیار دینارانە، لێ لدور ئینفاقێن فیعلی بیت هەیڤانە ژ 598 ملیار دیناران زێدەتر ژبو مە ناهێت، و رونشتنێن شاندێن هەرێمێ ژی هیچ ئەنجامەك نەبوویە، وبەغدا ژی هاتیە سەر شێوازێ قەركرنێ وبریار دایە 500 ملیاران بو هەرێمێ رەوانە بكەت و ئەڤە ژی تێرا مەناكەت، ژبەركو وەك جاران مە نەفت نەمایە ودەما هەرێمێ نەفت دفروت ل 20ی هەمی هەیڤان موچە ددان، هەر چەندە ئەو ژی ب لێبرین وپاشەكەفت ڤە.
لدور داهاتێن نافخویی ژی وەزیرێ داراییێ حكومەتا كاربرێكەر ئاشكرا دكەت: هەیڤانە نزیكی 320 ملیار دیناران داهاتێن نە نەفتی مە هەنە ژبو هەمی پێدڤیێن هەرێمێ، ئەو پارە ژی دگەل 500 ملیار دینارێن بەغدا تێرا موچەی ناكەت.
و وەزیرێ دارایی داخاز دكەت دانوستانێن دگەل بەغدا بەردەوام بن، هەتا ئەڤ نەحەقیە ل سەر هەرێمێ بێتە هەلگرتن، و ئەم بڤێ رازی نینە یا نوكە بەغدا گەهاندیە مە.