وەزیری دەرەوەی سووریا، ئەسعەد حەسەن شەیبانی ڕایگەیاند کە بانگھێشتنامەیەکی فەرمی بەدەست گەیشتووە، بۆ ئەوەی بەم نزیکانە سەردانی عێراق بکات و ئاماژەی بەوەشدا کە وڵاتەکەی پەیوەندییەکی باشی لەگەڵ ئوردن-دا ھەیە.
ئاژانسی ھەواڵیی فەرمی سووریا "سانا" بڵاوی کردەوە کە ئەسعەد حەسەن شەیبانی لە پەراوێزی بەشدارییکردنی لە لووتکەی جیھانی حکوومەتەکان لە دوبەی لە لێدوانێکدا بۆ ڕۆژنامەی "قەبەس"ی کوێتی گوتوویەتی: "بانگھێشتنامەکی فەرمیم بەدەست گەیشتووە، بۆ ئەوەی سەردانی عێراق بکەم و بەم زووانە لە بەغدا دەبم"، بێ ئەوەی وردەکاریی زیاتر لەوبارەیەوە بخاتەڕوو.
وەزیری دەرەوەی سووریا باسی لە پەیوەندییەکانی وڵاتەکەی لەگەڵ ئوردن کردووە و ڕایگەیاندووە: "پەیوەندییەکی باشمان لەگەڵ ئوردن-دا ھەیە، جگە لەوەش ئوردن و عێراق دوو وڵاتی دراوسێی سووریان".
ئەسعەد حەسەن شەیبانی سەبارەت بە دۆخی ئێستای سووریا، گوتی: "ئێمە دوای ڕووخانی ڕژێم، سیستەمێکی ئابووریی وێران و خراپمان بۆ ماوەتەوە و ھەموو شارەزاییەکی بواری ئابووریی ئاگاداری خراپی دۆخی ئابووریی سووریایە".
ھەروەھا ڕاشیگەیاند: "پێویستە ھەمووان پاڵپشتی لە سووریای نوێ بکەن، یەکێتیی ئەورووپا و ئەمریکا ڕازی بکەن کە سزا سەپێندراوەکانی سەر سووریا ھەڵبگرن".
