دیجیتال میدیا سپێده:
ژێدەرەكێ ئەمنیێ عیراقێ ئاشكراكر: دوهی 191خێزانێن كەمپا هوڵ ل سوریا بو پارێزگەها نەینەوا هاتنە ڤەگەراندن. ژێدەرەكێ ئەمنی بو میدیایێن عیراقێ راگەهاندیە: ب هەماهەنگیا ئەمنی دناڤبەرا وەزارەتا كوچ و كوچبەران و هێزێن سوریا دیموكرات هەسەدە ل سوریا، 191 خێزان ل خێزانێن كەمپا هوڵ، برێكا دەروازێ (یەعریبی) ل ناحیا رەبیعە بو عیراقێ هاتنە ڤەگەراندن.
ئاماژەكر: ڤەگەراندنا وان خێزانان ب رەنگەكێ نهێنی بویە، رێك نەدایە دەزگەهێن راگەهاندنێ روماڵ بكەن. هەروەسا رێكارێن ئەمنیێن دژوار گرتبونەبەر و ل كەمپێن پارێزگەها موسڵ ئاكنجیكرینە ل نێزیك گوندێ (جەدعە) ل باشورێ موسڵ.
گوتژی: ئەو خێزان یێن دەڤەرێن جودایێن عیراقێ نە، پشتی دهێنە رێكخستن، دێ بو دەڤەرێن وان هێنە ڤەگەراندن و بادەكا ئەمنی ژی دێ هێتە رێكخستن.
عیراق پێكولان ددەت كەمپا هوڵ ل سوریا هەلوەشینیتەڤە و بزوترین دەم دوماهیێ بڤێ بادەكێ بینیت، ئەڤەژی ژبەر مەترسیا كەمپێ بو سەر عیراقێ و دەڤەرێ، كو تەڤایا خێزانان سەر ب چەكدارێن داعشێ نە.
