مامۆستایانی ناڕازی هەڵەبجە په‌یامێك بڵاوده‌كه‌نه‌وه‌ و رایده‌گه‌یه‌نن،" داوا لە مامۆستایان و فەرمانبەران و سەرجەم مووچەخۆران دەکەین کە دەوامی بێمووچە ڕاگرن."

ئه‌وه‌ش هاتووه‌،"داوا لەسەرجەم چین و توێژەکانی کۆمەڵگەکەمان ئەکەین کە پاڵپشتی بایکۆت و ناڕەزایەتییەکانی مامۆستایانی ناڕازی بن و لە چالاکی و فشارە جۆراوجۆرەکانی دیکەی ڕۆژانی داهاتوو بەگەرموگوڕیی بەشدار بن و کۆڵ نەدەن"

ده‌قی بڵاوكراوه‌كه‌:

پەیامێک لە مامۆستایانی ناڕازی هەڵەبجەوە بۆ مامۆستایان و فەرمانبەران :

مامۆستایانی سەربەرزو خۆڕاگر ..

فەرمانبەرانی خۆشەویست..

کاسبکاران و گەنجانی بێکار ..

دیارە وەک هەمیشە مامۆستایان لەپێشەوەی هەڵوێست وەرگرتن بوون دژی ئەو بێ ڕێزی و برسیکردنەی دەرحەق بەکۆمەڵگا دەکرێت .ئێمە وەک مامۆستایانی ناڕازیی تەواو لەدۆخی دارایی مامۆستایان و مووچەخۆران ناڕازین ونیگەرانین، چاوەڕوانی ئێمە بەمانای خۆبەدەستەوادان نایەت، بەڵکو فرسەتێکمان بەهێزە سیاسییەکانی دەرەوەی پارتی و یەکێتی و هاوپەیمانەکانیان دا ، بۆ ئەوەی بۆ هەموو لایەک ڕوونتر ببێتەوە کە تاکە دڵسۆزی مووچەخۆران هەر خودی خۆیانن و بەس ، ئەڵبەت بەپاڵپشتیی خەڵکی زیندووی کۆمەڵگەکەمان..

بۆیە لێرەوە داوا لە مامۆستایان و فەرمانبەران و سەرجەم مووچەخۆران دەکەین کە دەوامی بێمووچە ڕاگرن ، چونکە ئەرک لەبەرامبەر مافە و کارکردن بەبێ ماف جۆرێکە لەکۆیلایەتی..

داوا لەسەرجەم چین و توێژەکانی کۆمەڵگەکەمان ئەکەین کە پاڵپشتی بایکۆت و ناڕەزایەتییەکانی مامۆستایانی ناڕازی بن و لە چالاکی و فشارە جۆراوجۆرەکانی دیکەی ڕۆژانی داهاتوو بەگەرموگوڕیی بەشدار بن و کۆڵ نەدەن تا تەوتین و پلەبەرزکردنەوە دەست پێئەکات و بازاڕ ئەبووژێتەوە و کۆتایی بە ستەم و نادادی دێت..

شکۆدار بێت خەباتی خەڵکی ناڕازیی هەرێمی کوردستان..

#بایکۆت

#خۆپیشاندان_و_ناڕەزایەتی_بەرەو_بەغدا

#خۆپیشاندان_بەرەو_هەولێر

مامۆستایانی ناڕازیی هەڵەبجە

٨ / ١٢ / ٢٠٢٤