وتەبێژی وەزارەتی ناوخۆی عێراق ڕایگەیاند: سنوورەكانی عێراق بەتەواوی پارێزراون، هەروەها پێویستیان بە هاوكاری دەرەوە نییە، هەروەها فەرماندەی هێزەكانی سنوریش دەڵێت، "هەمو لایەك دڵنیا دەكەینەوە كە هیچ ترسێك لەسەر سنورەكانمان نیە و ئامادەین بۆ هەر بارودۆخێكی نائاسایی".
میقداد میری، وتەبێژی وەزارەتی ناوخۆی عێراق ئەمڕۆ دوو شەممە ڕایگەیاند: سنوری عێراق لە دیوی سوریاوە بە تەواوی لە ڕێگەی دو فیڕقە لە فەرماندەیی هێزە سنورییەكانەوە پارێزراوە، ئەمە جگە لە پاڵپشتی سوپا و هێزەكانی كۆكردنەوەی جەماوەری، هەروەها وەزارتی ناوخۆی چەند یەكەیەكی لەبەشەكانی وڵامدانەوەی خێرا و پۆلسی فیدڕاڵی بۆ ئەو ناوچانە ناردوە.
ئاماژەی بەوەشكرد: "سێ هەزار و 813 كیلۆمەتری سنوری عێراق پارێزراوە و سنورەكان لەگەڵ سوریا لە باقی سنورەكانی وڵاتانی دراوسێ پارێزراوترە، هەربۆیە بەهیچ شێوەیەك ناتواندرێت ئەو سنورانە ببڕدرێت، ئەوەش بەهۆی ئەو ئامادەكاریانەی كە كراون".
میقداد میری باسی لەوەشكرد: "سنورەكانی عێراق لە ئێستادا باشترینن، دوو ساڵ لەمەوبەریش وەزارەتی ناوخۆ كاریكرد بۆ بەهێزكردنی ئاسایشی سنورەكان لەگەڵ وڵاتانی دراوسێ و پێویستمان بەهاوكاری لە دەرەوەی وڵات نیە".
