بانكی ناوەندی عێراق بڕیاریدا سەرجەم حەواڵەیەكی دارایی و پارەدان لەڕێگەی كۆمپانیاكانی تیك تۆكەوە رابگرێت.
بەپێی نوسراوێكی بانكی ناوەندیی عێراق كە ئاڕاستەی سەرجەم بانك و دامەزراوە داراییەكان كراوە تێیدا هاتوە، بەئاماژەدان بە نوسراوی وەزارەتی پەیوەندیەكان، بڕیاردرا هەمو حەواڵە داراییەكانی هاتو و رۆیشتو بۆ بریكارەكانی كۆمپانیای تیك تۆك لەناوخۆی عێراق رابگرن.
هەر بەپێی نوسراوەكە هەموو بانكە مۆڵەتپێدراوەكان و دامەزراوە داراییە نابانكییەكان پابەند كراون لەئەمڕۆوە ئەو بڕیارە بخەنەبواری جێبەجێكردنەوە.
ئەوەش لەكاتێكدایە بەشێك لە بلۆگەر و كەسایەتیەكانی سۆشیال میدیا بەردەوام لایڤیان لەتۆڕی كۆمەڵایەتی تیك تۆك دەكردەوە و لایەنگرانیشیان بەردەوام لەڕێگەی پۆینتەوە پارەیان بۆ دەنارد، بەشێك لەو بلۆگەرانە بەوتەی خۆیان داهاتێكی زۆری مانگانەیان لە رێگەی تیكتۆكەوە كۆدەكردەوە كە بەهەزاران دۆلاربووە.
