ئه‌مرۆ سه‌رایا ئه‌لقودس باڵى سه‌ربازى جیهادى ئیسلامى له‌كه‌رتى غه‌ززه ڤیدیۆیى دیلێكى دیكه‌ى زایۆنیان بڵاوكرده‌وه و ناوبراو داوا ده‌كات بایكۆتى سه‌رتاسه‌رى بكرێت تا نه‌تانیاهۆ ناچار بكرێت ئاگربه‌ست رابگه‌یه‌نێت.
له‌ڤیدیۆیێكدا ئه‌لیكسانده‌ر تۆربانۆڤ كه‌دیلێكى زایۆنیه وله‌لایه‌ن جه‌نگاوه‌رانى سه‌رایا قودس له 7ى ئۆكتۆبه‌ر له‌میانى ئۆپه‌راسیۆنى تۆفانى ئه‌قسا دا به‌دیلگیراوه ده‌ڵێت: هه‌ڵوێسته‌كانى حكومه‌ته‌كه‌ى نه‌تانیاهۆ بۆ برسیكردن وبۆردومانكردنى كه‌رتى غه‌ززه دیله‌كانى ئیسرائیلى ده‌كوژێت، وداواشى له‌دانیشتوانى قه‌واره‌كه‌ى كرد ده‌ست به بایكۆتى سه‌رتاسه‌رى بكه‌ن بۆ ئه‌وه‌ى به سه‌لامه‌تى له‌رێگه‌ى رێككه‌وتنى ئاگربه‌ست بگه‌رێینه‌وه.
تۆربانۆڤ ده‌ڵێت: زیاتر له‌ساڵێكه به‌دیلگیراوى له‌ده‌ستى موجاهیداندام، ساڵێك له‌كه‌مى خۆراك وخواردنه‌وه وبێ كاره‌با دا، وساڵێكه ژیانم ده‌كه‌وێته مه‌ترسیه‌وه به‌هۆى بۆردومانى سوپاكه‌مان له‌غه‌ززه وچه‌ندینجار جه‌نگاوه‌رانى سه‌رایا قودس ژیانى منیان رزگاركردوه، به‌ڵام ده‌ترسم به‌هۆى سیاسه‌ته‌كانى نه‌تانیاهۆیه‌وه سوپا شوێنى مانه‌وه‌م بۆردومان بكات وبمكوژن، وه‌ك زۆرێك له‌و دیلانه‌ى كه‌لێره كوژراون.
تۆربانۆڤ به ئیسرائیلییه‌كان ده‌ڵێت: ده‌مه‌وێت پێتان بڵێم كاتێك ئێوه ده‌روازه‌كان داده‌خه‌ن بۆ ئه‌وه‌ى ئاسته‌نگى بۆ فه‌له‌ستینیه‌كانى غه‌ززه دروست بكه‌ن، ئه‌و كات ئێوه ئاسته‌نگى بۆ ئێمه‌ى دیله‌كان دروست ده‌كه‌ن، وده‌شڵێت: دۆخى ئێمه زۆر خراپه ودواى ساڵێك حكومه‌ته‌كه‌مان جه‌نگى سه‌ر لوبنانیان ده‌ستپێكردوه هه‌تا ئێمه له‌بیر بكرێین ودواتریش جه‌نگى سه‌ر ئێران بۆ ئه‌وه‌ى دۆسیه‌ی ئێمه له‌ناوببرێت.
