فڕۆكه جه‌نگییه‌كانی ئیسرائیل زنجیره‌یه‌ك هێرشیان كرده سه‌ر زاحییه باشووری به‌یروت و فڕۆكه‌خانه‌ی نێوده‌وڵه‌تی ڕه‌فیق حه‌ریری، هه‌روه‌ها به بۆمبی هێشوویی پارێزگای بیقاع-یان له ڕۆژهه‌ڵاتی لوبنان بۆردومان كرد.
به‌پێی ئاژانسى ئه‌نادۆڵ ، به‌ره‌به‌یانی ئه‌مڕۆ پێنجشه‌ممه، فڕۆكه جه‌نگییه‌كانی ئیسرائیل زنجیره‌یه‌ك هێرشیان كرده سه‌ر زاحییه له باشووری به‌یروت و فڕۆكه‌خانه‌ی نێوده‌وڵه‌تی ڕه‌فیق حه‌ریری.
هاوكات ئاژانسی هه‌واڵی فه‌رمی لوبنان بڵاوی كرده‌وه كه فڕۆكه جه‌نگییه‌كانی ئیسرائیل له میانی زنجیره‌یه‌ك هێرشدا، به بۆمبی هێشوویی پارێزگای بیقاع-یان له ڕۆژهه‌ڵاتی لوبنان بۆردومان كردووه.
له‌به‌رامبه‌ردا، حزبوڵڵای لوبنان له ڕاگه‌یاندراوێكدا ئاماژه‌ی به‌وه‌داوه كه به ئاراسته‌كردنی مووشه‌ك، سه‌ربازانی ئیسرائیلیان له ده‌وروبه‌ری شارۆچكه‌ی ماڕون ڕه‌ئس له باشووری لوبنان كردووه‌ته ئامانج.
له به‌ره‌ی لوبنان، هێرشه‌كانی ئیسرائیل بۆ سه‌ر ناوچه جۆربه‌جۆره‌كان به‌رده‌وامه، هه‌ڵمه‌تێكی ئیسرائیلی له ناوچه‌ی ئه‌لجمور ئه‌لكه‌هه‌له، له چیای لوبنان له‌سه‌ر ڕێگای نێوده‌وڵه‌تی كه چیای لوبنان و پارێزگای بێكا به‌یه‌كه‌وه ده‌به‌ستێته‌وه كرده ئامانج.
لای خۆیه‌وه سوپای ئیسرائیل ڕایگه‌یاند، سه‌ربازێكیان له‌كاتی شه‌ڕه‌كانی باشووری لوبنان كوژراوه و كۆمپانیای په‌خشی ئیسرائیلیش ڕایگه‌یاندووه، كه سه‌ربازه‌كه دوێنێ به مووشه‌كه‌كانی حزبوڵڵا له ئه‌ڤیڤیم له جه‌لیلی سه‌ره‌وه كوژراوه.
