ئەنجوومەنی پەیوەندییەکانی ئەمریکا-ئیسلام داوای لە سەرۆکی ھەڵبژێردراوی ئەمریکا، دۆناڵد ترەمپ کرد کە بەڵێنەکەی لەبارەی بەدیھێنانی ئاشتی و کۆتایی ھێنان بە شەڕی کۆمەڵکوژی ئیسرائیل لە کەرتی غەززە جێبەجێ بکات.
لەمبارەیەوە سەرۆکی ئەنجوومەنی پەیوەندییەکانی ئەمریکا-ئیسلام، نیھاد عەوز لە ڕاگەیاندراوێکدا داوای لە سەرجەم بەرپرسە ھەڵبژێردراوەکانی ئەمریکا لەنێویاندا دۆناڵد ترەمپ کردووە کە بە ڕاستگۆیی مامەڵە لەگەڵ نیگەرانییەکانی دەنگدەرانی موسڵماندا بکەن.
ڕاشیگەیاندووە کە پێویستە دۆناڵد ترەمپ، بەڵێنەکەی لەبارەی بەدیھێنانی ئاشتی و کۆتایی ھێنان بە شەڕی کۆمەڵکوژی ئیسرائیل لە کەرتی غەززە جێبەجێ بکات بەڵام دەبێت ئەو ئاشتییە، ئاشتییەکی ڕاستەقینە و لەسەر بنەمای دادپەروەریی، ئازادی و دامەزراندنی دەوڵەتی سەربەخۆی فەڵەستین بێت.
پێشتر دۆناڵد ترەمپ لە میانی بانگەشەی ھەڵبژاردنەکانی سەرۆکایەتی ئەمریکا، بەڵێنی دابوو کە ھەوڵدەدات ئاشتی لە جیھان و ناوچەکە بەدی بێنێت، ھەروەھا کۆتاییش بە شەڕی سەر غەززە دەھێنێت.
