له دێربی كه‌نداو له گه‌ڕی دووه‌می كۆمه‌ڵه‌ی دووه‌می قۆناغی سێیه‌می پاڵاوتنی مۆندیال له ئاسیا ئه‌مشه‌و له‌كاتژمێر 9:00 شه‌و هه‌ڵبژارده‌ی عێراق ده‌بێته میوانی كوێت.
عێراق خاوه‌نی سێ خاڵه به بردنه‌وه‌ی له عومان له گه‌ڕی یه‌كه‌م پله‌ی یه‌كه‌می كۆمه‌ڵه‌كه‌ی گرتوه‌و كوێتیش به خاڵێكی گرنگ له ئوردن گه‌رایه‌وه‌و پله‌ی دووه‌می ریزبه‌ندی گرتوه.
ئه‌م یارییه به یارییه‌كی گرنگ بۆ هه‌ردوو هه‌ڵبژارده هه‌ژمار ده‌كرێت، به‌تایبه‌تی خیسۆس كاساسی راهێنه‌ر ده‌یه‌وێت تیپه‌كه‌ی سێ خاڵی تر به‌ده‌ست بهێنێت و پارێزگاری له پێشه‌نگی كۆمه‌ڵه‌كه‌ی بكات.
له‌م یارییه‌دا به‌هۆی پێكانه‌وه ئه‌یمه‌ن حوسێن ناتوانێت به‌شداری بكات ئه‌مه‌ش كاریگه‌ری له‌سه‌ر ئاستی تیپه‌كه دروست ده‌كات، به‌ڵام راهێنه‌ر رایگه‌یاند راسته ئه‌یمه‌ن حوسێن یاریزانێكی گرنگه له ریزی تیپه‌كه به‌ڵام كار بۆ ئه‌وه ده‌كه‌ین یاریزانه‌كانی تر شوێنی بگرنه‌وه‌و هاوكاری تیپه‌كه بكه‌ن له‌به‌ده‌ستهێنانی بردنه‌وه.
كوێت ماوه‌ی 10 ساڵ ده‌بێت نه‌یتوانیوه بردنه‌وه به‌رامبه‌ر به عێراق تۆمار بكات، له‌دواین دوو یاری دۆستانه‌ی نێوانیان عێراق له هه‌ردوو یارییه‌كه براوه بووه.
