ئه‌مرۆ ده‌بێته 338 رۆژ له‌سه‌ر یه‌ك قه‌واره‌ى زایۆنى درێژه به‌جینۆسایدكردنى گه‌لى فه‌له‌ستینى ده‌دات، سوپاى زایۆنى چه‌ندین ناوچه‌ى دیكه‌ى بۆردومان كردوه.
به‌رگرى شارستانى غه‌ززه بڵاویكرده‌وه: له‌بۆردومانێكدا سوپاى زایۆنى جێگرى به‌رێوه‌به‌رى به‌رگری شارستانى پارێزگاى باكورى غه‌ززه‌یان شه‌هید كردوه.
ئاماژه‌ى به‌وه‌داوه: له‌بۆردومانه‌كه‌ى سوپاى زایۆنى بۆ سه‌ر كه‌مپى جه‌بالیا كه‌خانووى كارمه‌ندێكى حكومى به‌ئامانج گرتووه تێیدا جێگرى به‌رێوه‌به‌رى به‌رگرى شارستانى پارێزگاى باكور به‌ناوى عه‌قید ئه‌بو عه‌بد مورسى و 4 ئه‌ندامى خێزانه‌كه‌ى شه‌هید كراون.
لایخۆیه‌وه، وته‌بێژى به‌رگرى شارستانى غه‌ززه ئاشكرایكردوه: ژماره‌ى شه‌هیدانى تیمه‌كانى به‌رگرى شارستانى له‌غه‌ززه به‌رزبۆته‌وه بۆ 83 كارمه‌ند و زیاتر له 200 بریندارن.
هه‌روه‌ها له‌شاره‌كانى ئیسرائیلى گه‌وره‌ترین خۆپیشاندان له‌مێژووى داگیركار دا شه‌وى رابردوو به‌رێوه‌چووه، كه‌خۆپیشانده‌رانى زایۆنى داواى ئه‌نجامدانى رێككه‌وتنى گۆڕینه‌وه‌ى دیله‌كان له‌گه‌ڵ حه‌ماس دا ده‌كه‌ن.
نیۆ ملیۆن كه‌س له‌ته‌ل ئه‌بیب و زیاتر له 250 هه‌زار كه‌سى دیكه له‌شاره جیاوازه‌كانى ئیسرائیل خۆپیشاندانیان له‌دژى بنیامین نه‌تانیاهۆ سه‌رۆك وه‌زیرانى قه‌واره‌ى زایۆنى ئه‌نجامدا وه‌ك فشارێك بۆ ئه‌وه‌ى رێككه‌وتنى ئاگربه‌ست له‌گه‌ڵ بزوتنه‌وه‌ى حه‌ماس دا ئه‌نجامبدات.
له7ى ئۆكتۆبه‌رى رابردووه‌وه سوپاى زایۆنى ماوه‌ى 11 مانگه جینۆسایدى گه‌لى فه‌له‌ستین ده‌كات تا ئێستا زیاتر له 135 هه‌زار هاوڵاتى فه‌له‌ستینى شه‌هید وبرینداركراون و زیاتر له 10هه‌زارى دیكه‌ش بێ سه‌روشوێنن.
