دیجیتال میدیا سپێدە:
بڕیاره ئه‌ڤێ حەفتیێ هویربینیا ناڤێن كاندیدێن په‌رله‌مانێ كوردستانێ ب دوماهی بهێن و كۆمسیۆنا بلندا سه‌ربه‌خۆیا هه‌لبژارتنا ناڤێ كاندیدان په‌سه‌ند بكەت.
عیماد جه‌میل، سه‌رۆكێ تیما رۆژنامه‌ڤانی ل كۆمیسیۆنا بلدا سه‌ربه‌خۆیا هه‌لبژارتنێن عێراقێ ڕاگەهاند: ئه‌ڤێ حەفتیێ هویربینیا دۆسیا كاندیدان ژلایێ ده‌زگایێن په‌یوه‌ندارێن عێراقێ و هه‌رێما كوردستانێ ب دوماهی هێت و ئه‌نجومه‌نێ كۆمیسیاران ڕاستاندن بۆ ناڤێن دكەت.
عیماد جه‌میل لدور ژماره‌یا ئه‌و كاندیدێن ژ هویربینیێ ده‌رنه‌چوون بەحسكر: تا نوكە حه‌فت كاندیدێن هه‌لبژارتنێن په‌رله‌مانێ كوردستانێ ل پشتی هویربینیا ل دۆسییان هاتنە دویرئێخستن.
ئه‌و ژی د دەمەكیدایە كە ل رۆژا 06-08-2024 بشێوه‌یەكێ ئه‌لكترۆنی و كاغه‌ز لیستا ناڤێن كاندیدێن خولا شه‌شێ یا هەلبژارتنا په‌رله‌مانێ كوردستانێ ب مه‌رەما هویربینیێ بۆ وه‌زاره‌تێن ناڤخۆ ل به‌غدا و هه‌ولێر و ده‌سته‌یێن ده‌ستپاكی ل حكومه‌تا فیدراڵی و هه‌رێما كوردستانێ هنارتینە.
سه‌رۆكێ تیما رۆژنامه‌ڤانی یا كۆمیسیۆنا بلندا سه‌ربه‌خۆیا هه‌لبژارتنێن عێراقێ گوتی: ل قۆناغا پشتی په‌سه‌ندكرنا ناڤێن كاندیدان، چاپكرنا كارتا ده‌نگدانێ دێ ده‌ستپێكەت.
