دیجیتال میدیا سپێدە:
سەروكێ فراكسیونا یەكگرتوو ل پەرلەمانێ عیراقێ راگەهاند: تەوتینكرنا مووچەی دێ ئاریشا مووچێ فەرمانبەرێن هەرێمێ ب ئێكجاری چارەسەر كەت، هەتا تەوتین ژی نەهێتە كرن ئەڤ ئاریشە دێ هەر بەردەوام بن.
د. جەمال كوچەر سەرۆكێ فراكسیونا یەكگرتوو وئەندامێ لژنا دارایی ل پەرلەمانێ عیراقێ ژبو سپێدە راگەهاند: لدەمێ رونشتنا لژنا دارایی دگەل تەیف سامی وەزیرا داراییا عیراقێ ئاماژە بو وێ یەكێ هاتە كرن، هویربینی ژ لیستا موچێ فەرمانبەران بدوماهی هاتیە وبەشەك ژلیستا هێزێن ئەمنی هویربینی تێدا دهێتە كرن وچاڤەرێ دهێتە كرن ل چەند رۆژێن بهێت پارێ تەرخانكری ژبو موچەی بێتە رەوانەكرن.
راگەهاند ژی: مە 4 پرسیار ئاراستەی وەزیرا دارایی كرن ئەو ژی، بوچی موچێ هەیڤا 7 یێ فەرمانبەران هاتیە گیروكرن، و وەكهەڤكرنا موچێ خانەنشینان و پرسا وانەبێژ وگرێبەستێن هەرێمێ وهەروەسا هنارتنا نەفتا هەرێمێ ژبو توركیا. دبەرسڤدا وەزیرا دارایی گوت: تا نوكە ناڤێن فەرمانبەران ل دیوانا چاڤدێریا دارایی بوون ونوكە ژی ل ژمێرییا دارایینە، و لدەمێن بهێت ل دوماهیا ڤێ حەفتیێ پارێ موچەی ژبو هەرێمێ دێ رەوانە كەین، لدور موچێ هێزێن ئەمنی ژی وەزیرا دارایی گوت: هەرێمێ ناڤ رەوانە نەكرینە و تا نوكە ژی 8 هزار ناڤان پێداچوون بو هاتیە كرن و ژمارەیەكا دی ژی ب كود هاتینە هنارتن، لەورا نەشێم هیچ بڕە پارەیەكی بدەین بتنێ ئەگەر ب بریارەكا سەروك وەزیران نەبیت.
لدور خانەنشین وەكهەڤكرنا وان، وەزیرا دارایی گوتیە: بابەتەكێ یاساییە و تا نوكە ژی هەرێم لدور یاسا خانەنشینیا كەڤن دچیت، ددەمەكێ دا ئەو یاسا ل عیراقێ نەمایە، لەورا پێدڤیە هەرێم دەست بەرداری وێ یاسایێ بیت وپابەندی یاسا خانەنشینیا ئێكگرتیا عیراقێ بیت، وهندەك پرسێن دیێن تایبەت ب خانەنشینان ژی هەنە وپێدڤیە بێنە چارەسكرن لەورا هەتا نوكە ڤێ پرسێ چ پێنگاڤ بو نەهاتینە هاڤێتن.
لدور پرسا وانەبێژ وگرێبەستان ژی وەزیرا دارایی ب روهنی گوت: هیچ دەقەكا یاسایی مە نینە هەتا وان دامەزرینین، ژبلی نەبوونا پارێ پێدڤیی ژبو وێ تەخێ، لدور هنارتنا لیستا موچەی ژی گوت: پێدڤیە هەرێم هەمی هەیڤان لیستێ وەك ئێك رەونە بكەت، چونكی هەمی هەیڤان جوداهی تێدا هەیە وگهورینێ تێدا دكەت، لدور رادەستكرنا داهاتێنن هەرێمێ ژی دبێژیت: پێدڤیە هەرێم ژبو سالەكێ 13 ترلیون ونیڤان ژ داهاتێن نەفتی و نەنەفتی رادەستی بەغدا بكەت، لێ هەرێمێ بتنێ 230 ملیار رادەست كرینە، ئەڤە ژی ئاریشەیەكا مەزنە دناڤبەرا هەردوولایان دا.
د. جەمال كۆچەر ئاشكراكر: پێدڤیە موچە بێنە تەوتینكرن هەتا ئاریشا موچەی ل هەرێمێ ب ئێكجاری چارەسەر ببیت، ئەگەر نە دێ هەمی هەیڤان ئەڤ ئاریشە دووبارە بن، وگوت: بگوتنا تەیف سامی هەتا دوماهیا ڤێ حەفتیێ دێ موچێ هەیڤا 7 هێتە رەوانەكرن.
