دیجیتال میدیا سپێده:
سەبارەت ب پاشكهفتنا مووچەیێ مووچەخۆرێن هەرێما كوردستانێ و ئەو گرفتێن كو هاتینه بهرامبهر هنارتنا مووچەیێ ههیڤێن 10 و 11 و 12 ل بەغدا، یەكگرتوویا ئیسلامیا كوردستانێ هەلویستێ فەرمی یێ خۆ دەربڕییه و راگههاند:، دادگهها فیدراڵی هەردوو حكومەتێن هەرێم و عێراقێ پابەند كرییه ب دابینكرنا مووچە بۆ مووچەخۆرێن هەرێما كوردستانێ.
لدور وێ یهكێ خەلیل ئیبراهیم، پهیڤدارێ فەرمی یێ یەكگرتوویا ئیسلامیا كوردستانێ بۆ سپێدە راگههاند: ئهم وەكو یەكگرتوویا ئیسلامیا كوردستانێ رێرەوێ سەرەكی یێ چارەسەرییا مووچهیی د وێ یهكێ دیت كو دڤێت دادگهها فیدراڵی هەردوو حكومەتێن هەرێم و عێراقێ پابەند بكهت ب دابینكرنا مووچەیی بۆ مووچەخۆرێن هەرێمێ و خۆشبەختانە ساڵا پار ئەو بابەتە گەهشته ئەنجام و دادگهها فیدراڵی ل روانگەها سكالایا یەكگرتوو بڕیارا دروست دا كو ئەو ژی پابەندكرنا هەردوو حكومەتان ب پیدانا مووچەیی وگرێدانا وێ ب هیچ ئاریشهیهكا سیاسی یا دناڤبهرا حكومەتا فیدراڵ و حكومەتا هەرێمێ، لێ ئهڤه ئهڤساله ژیدا ب ئهگهرێ كێمترخهمیا هەردوو حكومەتا جارهكا دی دلگرانی و دوو دلی بۆ وهڵاتیان دروست بوویە ب وێ كو مووچەیێ ههیڤا 10 پاشكهفتییه و تا نوكه روون نینە كو مووچەیێ ئەڤێ ههیڤێ و ههیڤێن 11 و 12 ژی كهنگی و چهوا بهێته دابینكرن كو بوویه ئهگهرێ سستیا بازاری و چەقبەستوویا ئابووری ل هەرێما كوردستانێ.
پهیڤدارێ یهكگرتوو ئاماژە ب وێ یهكێ دا، ئهم وهكو یەكگرتوو ب ڕێكا پەرلەمانتارێن خر ل بەغدا بەردەوامین لسەر پێكولێن خۆ بۆ چارەسەركرنا ئەو گرفتێن هاتینه ههمبهر هنارتنا مووچەیێ ههیڤێن 10 و 11 و 12 و ب هیچ جورهكی نابیت ب بههانهیێن جیاواز ئێدی ستەم ل مووچەخۆرێن هەرێمێ بهێتهكرن، چونكی هەر ساڵ ب بهانهیهكێ چەند مووچهیێن فەرمانبەران دخون و ناهێنرن.
پهیڤدارێ یەكگرتوو دبێژیت: ئهم وهكو هێزهكا ئۆپۆزسیۆنێ بەرپرسانە دێ بەردەوام بین ژ داكۆكیكرنا مافێن خەلكی و مووچەخۆران و جارهكا دی داخوازێ ژ حكومەتا هەرێمێ دكەین كو ب ڕژدی ئاریشهیێن خۆ دگهل حكومەتا عێراقێ چارەسەر بكهت و ئێدی یاریێ ب قویت و ژیانا وهڵاتیان نەكهت.
