دیجیتال میدیا سپێده:
ژبەر پەقینا بومبەكا چاندی ب ترومبێلەكا سەربازیا سەر ب وەزارەتا بەرەڤانیا عیراقێ، سێ ئەندامێن هێزێن پێشمەرگەی شەهیدبوون، دوو ژوان پلەدارێن سەربازینە.
ئاژانسا نوچەییا فەرمیا عیراقێ بەلاڤكریە: سپێدەهیا ئەڤرو لدەمێ ئەركێ سەربازیدا، بومبەكا چاندی ل سنورێ چیایێ (غەڕڕە) ل نێزیك خورماتوو ل پارێزگەها كەركوك، ب هێزێن لیوایا هەڤبەش یا هێزێن پێشمەرگە و سوپایێ عیراقێ دا پەقییە.
لدور زانیاریان، ژبەر پەقینا وێ بومبێ، دوو پلەدارێن سەربازیێن پێشمەرگەیی و زێرەڤانەك شەهید بوینە و سێ پێسمەرگەهێن دیژی بریندارن.
ل هندەك دەڤەرێن سنورێ پارێزگەها كەركوكێ، چەكدارێ داعشێ هندەكجاران هێرشێ دكەنە سەر هێزێن پێشمەرگەی و سوپایێ عیراقێ، كو دچوارچوڤێ لیوایا هەڤبەشدا ئەركێ پاراستنا دەڤەرێ ل ستویێ وان دایە، سەرباری وێ یەكێ چەند جاران سوپایێ عیراقێ ب فرۆكێن شەری بوردومانا دەڤەرێ دكەت، لێ ڤەلڤینا چەكدارێن داعشێ ل وێ دەڤەرێ یا بەردەوامە.
ل ئەیلولا رابوری ژی ل ئەنجامێ پەقینا بومبەكا چاندی، ئەفسەرەكێ سوپایێ عیراقێ گیانێ خو ژدەستدا و ئەفسەرەك و سەربازەك ژی بریندار بوون.
