دیجیتال میدیا سپێده:
پشتی دەربازبوونا 17 روژان لسەر گیروبوونا موچە و نەهاتنا پارەی ل بەغدا، ئەڤرو سەروك وەزیرێن عیراقێ بریاردا ب مەزاختنا موچێ هەیڤا 10 یێ فەرمانبەرێن هەرێمێ.
دوهی محمد شیاع سودانی سەرۆك وەزیرێن عیراقێ، وەزارەتا دارایی راسپارد داكو ڤێ حەفتیێ موچێ هەیڤا 10 یێ موچێ فەرمانبەرێن هەرێمێ مەزێخیت و ئیمزا ژی لسەر كریە.
بریارا هنارتنا پارەی ل بەغدا بو دابەشكرنێ، لدەمەكیدایە هند نەمایە هەیڤا 11 دوماهیك بهێت، كو مەترسی لسەر ژناڤچوونا سێ موچێ فەرمانبەرێن هەرێمێ هەیە. گیروبوون ژی ژبەر پابەندنەبوونا هەرێمێ یە ب بریارێن دادگەها فیدرالی بو تەوتینكرنا موچەی. كو هەموو هەیڤەكێ لیستا ناڤان ب كومەكا ئاریشانڤە بو بەغدا دهێتە هنارتن. ئەڤە ژبلی رادەستنەكرنا داهاتێ نەفتی و نانەفتی ب بەغدا.
ئەگەر حكومەتا عیراقێ لڤێ حەفتیێ دا گوژمێ پێدڤی بو موچێ هەیڤا 10 بهنێریت، حكومەتا دەم بسەرڤەچووییا هەرێمێ ژبەر سەرژمێریێ، چێدبیت نەشێت موچەی دابەش بكەت.
