دیجیتال میدیا سپێدە:
ئەڤرو دادگەها داد یا نێڤدەولەتی بەرنیاس ب لاهای ل وەلاتێ هولەندا دەست ب رونشتنا خو كر لدور وان سزایێن یاسایی یێن داگیركاریا ئیسرائیل بۆ سەر ئاخا فەلەستین لدەمێ سالا 1967.
رونشتنا دادگەها لاهای دنوكە دا یا بەردەوامە، وتیما یاسایی یا فەلەستین ژی راپۆرتا خو پێشكێشكریە وراگەهاندیە: ئیسرائیل رەتدكەت دانوستانان بكەت لسەر بنەمایێ بریارێن نەتەوێن ئێكگرتی وپێڤە پابەند نابیت، وسەرۆك وەزیرێن دەولەتا زایۆنی رەتدكەت دانپێدانێ ب دەولەتا فەلەستینی بكەت، ویێ رژدە لسەر داگیركاریێ.
وئاشكراكریە: بویەرێن ڤێ دوماهیێ ل غەززە دێ كاریگەریا خراب ل سەر رەوشا ئاسایشا دەڤەرێ هەبیت و نەرینا دادگەها لاهای لسەر بادەكا فەلەستین یا گرنگە.
ژلایێ خوڤە، ریاز مالیكی وەزیرێ دەرڤەیێ فەلەستین ل دادگەها لاهای راگەهاند: ژبەر سزا نەدانا ئیسرائیل كۆمەڵكوژی ل غەززە د بەردەوامن، وگوت: گەلێ فەلەستینی هاتیە بێ بەهكرن ژمافێ هەبوون وچارەیێ خونڤیسیێ، وئیسرائیل بەردەوامە لسەر دزینا ئاخا فەلەستین.
راگەهاند ژی: پێدڤیە داگیركاریا ئیسرائیلی بێتە راگرتن و یاسا نێڤدەولەتی دڤی واریدا سەر بكەڤیت، ژبەركو ئیسرائیل سێیەكا ئاكنجیێن فەلەستینی دەركرینە وجهێن وان داگیركرینە، وپێدڤیە داگیركاریا زایۆنی ب بێ مەرج بدوماهی بهێت و دەم هاتیە ژبو دانانا سنورەكی ژبو جوداكاریا ل هەمبەری گەلێ مە دهێتە كرن وداخازا مافێ هەبوونا دەولەتا خو دكەین.
وەزیرێ دەرڤەیێ فەلەستین راگەهاند: ئیسرائیل بتنێ سێ بژاردە بو گەلێ فەلەستینی هێلاینە، ئەو ژی یان كوچكرن، یان گرتن، یان كوشتن، وئیسرائیل فەرمانێن دادگەها لاهای پشتگوهـ هاڤێتینە وبەردەوامە ژكومكوژیان ل غەززە. وخویاكر: فەلەستین هەتا نوكە ژی مەزنترین تاقیكرنە ژبو راستی ودروستیا سیستەمێ نێڤدەولەتی وجێبەجێكرنا یاسایێن نێڤدەولەتی.
ژلایەكێ دیڤە، رێكخراوا لێبورینا نێڤدەولەتی راگەهاندیە: پێدڤیە ل سەر ئیسرائیل داگیركاریا خو ژبو سەر ئاخا فەلەستین راگریت ومافێن مروڤی بنپێ نەكەت، وسیستەمێ جوداكاریێ رابگریت. وخویاكریە: داگیركاریا ئیسرائیل لسەر ئاخا فەلەستین درێژترین داگیركاریا سەربازیی و دژوارترینە ل سەرانسەری جیهانێ. وپێدڤیە هەمی وەلاتێن جیهانێ پێداچوونێ ل پەیوەندیێن خو دگەل ئیسرائیل دا بكەن وپشتەڤانیێ لێ نەكەن.
