دیجیتال میدیا سپێدە:
ب هزاران كەس ل واشنتنا پایتەختێ ئەمریكا ل هەمبەر ئاڤاهیێ كونگرێسی خوپیشاندان ئەنجامدا، ئەڤە لدەمەكیدایە پلێن گەرمێ هاتینە خوارێ و داخازێ دكەن: بلەز شەرێ سەر غەززە بهێتە راگرتن.
هەروەسا ل لەندەن یا پایتەختێ بریتانیا ژی ب سەدان هزار كەسان خوپیشاندان ئەنجامداو داخازكرن: كومكوژیێن سەر گەلێ فەلەستینێ ل غەززە بهێنە راگرتن.
خوپیشاندانا باژارێ واشنتن ل دەڤەرا چینا ناڤەراستا باژارێ دەستپێكر، بەرەڤ ئاڤاهیێ كونگرێسی برێكەفتن، ل جاددەیا پەنسلڤانیا دوماهی هات. ل خوپیشاندانێدا ئیدانا پێشێلكاریێن ئسرائیلێ هاتەكرن ل غەززە كو ب پشتەڤانیا ئیدارا ئەمریكا كومكوژی بەردەوامن.
ژلایەكێ دی ب سەدان هزار كەس ل لەندەن خوپیشاندان دەستپێكر بو راگرتنا كومكوژیێن زایونیان ل غەززە، ب رێپیڤان چونە هەمبەر بالیوزخانا ئسرائیلێ و داخازا ئازادیێ بو فەلەستینێ كرن. ئسرائیل ب دەولەتا زایونی و جوداكاریێ ناڤبر. داخازكرن: جینوسایدكرنا گەلێ فەلەستینێ بهێتە راگرتن و ژیانا فەلەستینیان ب گرنگ بزانن. داخازكرن: حكومەتا بریتانیا پشتەڤانیێن خو بو ئسرائیلێ راگریت.