ئه‌نته‌رمیلان دێربی برده‌وه‌و پێشه‌نگی له‌ یۆڤنتۆس وه‌رگرته‌وه‌

بۆتان عومه‌ر 10/02/2020 - 11:53 بڵاوکراوەتەوە لە هه‌واڵی وەرزشی

یانه‌ی ئه‌نته‌رمیلان گه‌ڕایه‌وه‌ پێشه‌نگی خولی یانه‌كانی ئیتاڵیا پاش بردنه‌وه‌ی دێربی میلانۆ به‌ چوار گۆڵ به‌رامبه‌ر به‌ دوو گۆڵ له‌ یارییه‌كانی جه‌وله‌ی 23ی خوله‌كه‌.

هه‌رچه‌نده‌ سه‌ره‌تا یانه‌ی ئه‌نته‌ر به‌ دوو گۆڵ له‌ دواوه‌ بوو به‌ڵام دواتر به‌ چوار گۆڵ وه‌ڵامی میلانی دایه‌وه‌و پێشه‌نگی وه‌رگرته‌وه‌.

ئه‌نتی ریبیچ له‌خوله‌كی 40 گۆڵی یه‌كه‌می بۆ میلان تۆمار كرد گێمی یه‌كه‌میش به‌م گۆڵه‌ كۆتایی هات، له‌گه‌ڵ ده‌ست پێكردنه‌وه‌ی گێمی دووه‌م به‌یه‌ك خوله‌ك زلاتان ئیبراهیمۆفیچ گۆڵی دووه‌می بۆ میلان تۆمار كرد ، له‌دوای ئه‌مه‌ش ئه‌نته‌رمیلان ده‌ستی به‌ تۆمار كردنی گۆڵ كرد، له‌خوله‌كی 51 مارسیلۆ برۆزۆفیچ گۆڵی یه‌كه‌می بۆ ئه‌نته‌ر تۆمار كرد، دوای سێ خوله‌كی تر ماتیاس فیچینۆ گۆڵی به‌رامبه‌ری بۆ ئه‌نته‌رمیلان تۆمار كرده‌وه‌.

ئه‌نته‌ر له‌ ئاسته‌ به‌رزه‌كه‌ی به‌رده‌وام بوو ستیڤان دی فری له‌خوله‌كی 70 گۆڵی سێیه‌می تۆمار كرد، دواین گۆڵیش له‌لایه‌ن رۆمیلۆ لۆكاكۆ له‌خوله‌كی سێیه‌می كاتی به‌فیرۆچووی یارییه‌كه‌ تۆمار كرا، به‌م بردنه‌وه‌یه‌ش ئه‌نته‌رمیلان بووه‌ خاوه‌نی 54 خاڵ به‌ جیاوازی گۆڵ پێشه‌نگی له‌ یۆڤنتۆس وه‌رگرته‌وه‌.