دیجیتاڵ میدیای سپێده
ئەمینداری گشتی یەکگرتوو بۆ باڵیۆزی روسیا: داوا دەکەین قەیرانی نەوت و غاز بەجۆرێک چارەسەر بکرێ کە هاوڵاتیانی هەرێم سودمەندی سەرەکی بن
ئەمرۆ چوارشەممە بەرواری ٢٥/٥/٢٠٢٢ بەڕێز مامۆستا سەلاحەدین محمد بەهائەدین ئەمینداری گشتی یەکگرتووی ئیسلامی کوردستان و شاندی یاوەری لە بارەگای باڵیۆزخانەی روسیا لە بەغدا لەگەڵ بەڕێز ئەلبەڕۆس کۆتراشیف کۆبۆوە .
ئەمینداری گشتی یەکگرتوو نیگەرانی خۆی بەرامبەر شەڕی روسیا و ئۆکرانیا دەربری کە شەڕێکی ترسناکە بۆ ئاسایشی هەموو جیهان و مرۆڤایەتی خستۆتە بەردەم مەترسی برسێتی و قەیرانی خۆراکەوە .
بەڕێزیان رایانگەیاند: سەدان کاتژمێر دانوستان باشترە لە یەک کاتژمێر شەڕ.
هەروەها وتیان: رێکەوتنی سیاسی باشترین رێگایە بۆ چارەسەر کردنی کێشەکانی نێوانتان.
لە بەشێکی تری وتەکانی، مامۆستا سەڵاحەدین محمد بەهائەدین، تیشکی خستە سەر قەیرانەکانی عێڕاق و هەرێمی کوردستان، بەڕێزیان دیدگای یەکگرتووی لە مەڕ قەیرانی سیاسی عێڕاق و بنبەستی رێگاکانی گفتوگۆی نێوان لایەنە ناکۆکەنان خستەڕوو، لەو بارەوە رایانگەیاند: دیدگای یەکگرتوو بینایە لەسەر گفتوگۆی سیاسی و گەیشتن بە تەوافوقی نیشتیمانی ، تا لەم قۆناغە هەستیارەی دۆخی نێوخۆیی و ئیقلیمی و نێودەوڵەتی ژیانی سیاسی و ئابوری و کۆمەڵایەتی عێراق ئارام و سەقامگیر بێ.
هەروەها وتیان روسیا وەک دەوڵەتێکی گەورە دەتوانێ رۆڵی ئیجابی بگێڕێت .
سەبارەت بە کێشەکانی هەرێمی کوردستان و ناوەند ، ئەمینداری گشتی یەکگرتوو رایگەیاند: خەڵکی کوردستان تووشی قەیرانی ئابوری دەستکردی سیاسی کراون ، ئەو قەیرانە دەستکردانە ژیان و گوزەرانی هاوڵاتیان بە گشتی و مووچەخۆران بە تایبەتی قورس و سەخت کردووە .
مامۆستا سەڵاحەدین محمد بەهائەدین ، داوایان کرد روسیا رۆڵی ئیجابی خۆی ببینێت بۆ چارەسەر کردنی پرسی نەوت و غاز لەسەر بناغەی بنەما دەستورییەکان ، بە جۆرێک خەڵکی کوردستان سودمەندی سەرەکی بن .
بەڕێز ئەلبەرۆس کۆتراشیف ، باڵوێزی روسیا ، بە سوپاسەوە خۆشحاڵی خۆی بۆ ئەو دیدارە دەڕبری .
باڵیۆزی روسیا رایگەیاند: ئەوانیش شەڕیان ناوێ ، بەڵام ئەو شەڕە بۆ دەوڵەتی روسیا بۆتە چارەنووس و ئایندەی مان و نەمان کە ناتوانین لێی بگەڕێینەوە .
هەروەها پێیان وابوو ڕۆژئاوا خۆیان تێکەڵی شەڕەکە نابن ، بەڵام هەموو توانای سەربازی و تەکنەلۆژی خۆی دەخاتە خزمەتی ئۆکڕانیا تا تەمەنی شەڕەکە درێژ بکەنەوە .
زیاتر وتیان ئێمەش نیگەرانین لە دروست بوونی قەیرانی خۆراک و راوەستانی زنجیرەکانی دابین کردنی گەنم ، ئێمەش ئەوەمان ناوێ .
لە بارەی قەیرانی سیاسی عێڕاق ، هاورا بوون کە پێوستە بە تەوافوق ئەو بنبەستە سیاسیە بشکێنرێت و دەریچە بدۆزرێتەوە .
هەروەها وتیان ئێمە هاوڕێی گەلانی ناوچەکەین وپێمان باشە بە گفتوگۆ کێشەکانیان چارەسەر بکەن .
تایبەت بە قەیرانی نەوت و غآزی نێوان بەغدا و وهەرێم ، باڵوێزی روسیا رایگەیاند : سامانی سروشتی عێڕاق و هەرێم ، موڵکی خۆیانە، ئەوان ئازادن لە چۆنێتی چارەسەر کردنی سیاسیانە و رێگر نابین لەهەر رێکەوتنێکی دەستوری نێوانیان . دەشتوانین هاوکار بین .
