فەرەیدون قاسم : سپێدە لە هەموو کەناڵێک زیاتر خزمەتی هونەری کردووە

21/02/2020 - 14:39 بڵاوکراوەتەوە لە كوردستانی

دیجیتاڵ میدیای سپێده‌


روونكردنەوەیەكی پێویست لەسەر رۆژنامەی (زەمەن) تكایە بەسی بكەن متمانەمان بە ئێوەش نەما
بەڕێزان من وەك هونەرمەندێكی بواری نواندن، كە ساڵانێكی زۆرە لە نێو كاری شانۆیی و درامای و بەرنامە تەلەفزیۆنیەكان كار دەكەم و بەشدارییەكی كارام هەبووە، خۆم بە موڵكی هەموو تیپ و گروپێك زانیووە، بەتایبەتی ئەو تیپ و گروپانەی بەڕێزەوە مامەڵەیان لەگەڵمدا كردووە، بە نموونە تیپی هونەری (زەنێ) و كاستی پرۆگرامی (مقۆ مقۆ) لەكەناڵی سپێدە.
بەداخەوە كاتێك متمانە دەكەی بە رۆژنامەنووسێك و قسەی بۆ دەكەی، بەڵام ئەو لەو ئاستەدا خۆی نابینێتەوە، لەگەڵ رێزم بۆ هەموو رۆژنامەنووس و میدیاكارێك، بەڵام بەداخەوە لە پێناوی پەیداكردنی (لایك و كۆمێنت) بۆ ئەوەی خەڵك بابەتەكەیان بخوێنەوە، بە هەزار پاڕانەوەو تەلەفۆن كردن، تاوەكو دوو قسەیان بۆ دەكەی پاشان قسەكان بەلا رێدا دەبەن، تەنها بۆ ئەوەی خۆیان بكەن بە باسی رۆژگار!
جێگەی داخە رۆژنامەیەك خۆی بە رۆژنامەیەكی بەناوبانگ بزانێت، كەچی لەرێگەی پەیامنێرێكیان بكەوێتە هەڵەیەكی ئاوا گەورەوە، گوایە دیداری هونەری ئەنجام دەدات لەژمارەی رۆژی 17-2-2020 لەرێگەی رۆژنامەنووسێك بەناوی (مەزهەر كەریم) دیمانەیەكی بەندە، كە بەر لە (2) مانگ بگرە زیاتریش لەگەڵ من ئەنجامی داوە، جارێ من لەوە تێناگەم بۆچی دەبێ دیمانەیەك ئەوەندە دوا بخرێت لەكاتێكدا ئەوەندە پەلەی بێت رۆژی 10 جار تێل بكات بۆ ئەوەی قسەی بۆ بكەیت؟!
پاشان كۆمەڵێك قسەی بەناوی منەوە كردوویەتی، كە ئەسڵ و ئەسای نیە بۆ نموونە باسی كاستی پرۆگرامی (مقۆ مقۆ)ـی كردووە، جارێ بەهیچ شێوەیەك تۆ ناتوانی پێوەر دابنێت بڵێت ئەو بەرنامەیە بینەری چەندەو چۆنە لەكاتێك ئەو بەرنامەیە لە ئێستادا میرات گری سەرجەم پرۆگرامە كۆمیدی تەنز ئامێزەكانە زۆرترین ئەكتەری بە ئەزموون، ئەكتەری شارەكانی هەولێر و سلێمانی، ئەكتەری گەنج و بە ئەزموونی لەخۆی كۆكردۆتەوە، ئینجا بەرنامەیەك (21) ئەلقەی لێ ریكۆرد كرابێ خاوەنی زۆرترین بینەری سۆشیال میدیا بێت، خاوەنی زۆرترین سپۆنسەر و ریكلام بێت پێت وایە من ئەوەندە بێ ئاگام بڵێم هۆكاری نەبوونی بینەرەی كەناڵەكەیە، بۆ مێَژوو من ئەوە رادەگەینم هیچ كەناڵێكم نەدیووە وەك كەناڵی (سپێدە) رێز لە هونەرمەند و هونەر بگرن، بگرە ئەوەی كەناڵە عیلمانییەكان چەند ساڵە لاف و گەزافی پێوە لێدەدەن وا دەرنەچوو، فەرموون سەیر بكەن كێ خەریكی خزمەتە بە درامای بیانی و توركی، كێیش خزمەتی هونەری خۆمەڵی و هونەری رەسەن دەكات، بۆیە لای من (سپێدە) لە ئێستادا پێشەنگی ئەو كاروانەیە.
پاشان لە بەشێكی دیكەی دیدارەكەدا دەڵێت من ناتوانم كاری هونەری ئەنجام بدەم، كە ئەوەیان مانشێتێكی زۆر عەیب و سەمەرەیە لە كاتێكدا من هەفتانە كاری هونەرییم هەیەو بەشداری مقۆ مقۆ دەكەم و ئەكتەرێكی سەرەكی ئەو پرۆگرامەم، یان كاكی رۆژنامەنووس لای تۆ پرۆگرامی مقۆ مقۆ پرۆگرامێكی وەرزشییە نەك هونەری؟!
لەبەشێكی دیكەی دیدارەكەدا دیسانەوە قسەیەك و تۆمەتێكی دیكەی هەڵبەستووە، من بەهیچ شێوەیەك نەموتووە ئەكتەری ناودارمان لەگەڵ نیە بۆیە پرۆگرامەكەمان ئاوایە، بەڕێزم دڵنیابە من ئەوەندە بێ ئاگا نیم لەوەی هەر هونەرمەندێك خاوەنی پێگەو مەقامی خۆیەتی لە ئێستادا پرۆگرامی مقۆ مقۆ زۆرترین ئەكتەری بەناوبانگ بەشداریی تێدا كردووەو هیچ پرۆگرامێك ناتوانێ وەك مقۆ مقۆ 12 ئەكتەری ئاوا لە خۆی كۆبكاتەوە.
لە كۆتایی دا نامەوێ درێژەی پێ بدەم بەڵام تەواوی ئەو دیدارە من رەتی دەكەمەوەو ئەوە بۆچوونی من نیە، ئەو برا رۆژنامەنووسەو ئەو رۆژنامە بەڕێزە داوای لێبوردن لەمن و كاستی پرۆگرامی مقۆ مقۆ نەكات رێگای یاسای دەگرمە بەرو ئەو دیدارەش لەگەڵ ئەو بەرێز بە تەلەفۆن ئەنجامدراوە تەواوی دیدارەكە لەنێو مۆبایلەكەم تۆماركراوەو هەمووی بڵاو دەكەمەوە بەڵام دوای ئەوەی داواكەم پێشكەشی دادگا كرد.
سوپاس بۆ گشت لایەك
فەریدون قاسم
ئەكتەری پرۆگرامی مقۆ مقۆ
20-2-2020

محه‌ممه‌د ئه‌مین