یەكگرتووی ئیسلامیی كوردستان لیستی كاندیدەكانی خۆی بۆ هەڵبژاردنی پەرلەمانی كوردستان پێشكەشی كۆمیسیۆنی باڵای سەربەخۆی هەڵبژاردنەكانی عێراق كرد، كاتی پێشكەشكردنی حزب و هاوپەیمانی و كاندیدە سەربەخۆكانیش درێژكرایەوە.
ئەمڕۆ، دوایین وادە بوو بۆ ئەوەی حزب، هاوپەیمانی و كاندیدە سەربەخۆیان لیستی ناوی بەربژێرەكانییان پێشكەش بە كۆمیسیۆنی باڵای سەربەخۆی هەڵبژاردنەكانی عێراق بكەن، لایخۆیەوە، وتەبێژی كۆمیسیۆنی باڵای سەربەخۆی هەڵبژاردنەكانی عێراق، جومانە غەلای وتی: "وادەی پێشكەشكردنی حزب و هاوپەیمانی و كاندیدە سەربەخۆكان تا ڕۆژی یەكشەممە 31ی ئادار درێژكرایەوە".
بڕیارە لە 10ی حوزەیرانی 2024، هەڵبژاردنی خوولی شەشەمی پەرلەمانی كوردستان - عێراق بەرێوە بچێت و تیاییدا هەرێم كراوەتە چوار بازنەی دەنگدان و كۆمیسیۆنی باڵای سەربەخۆی هەڵبژاردنەكانی عێراقیش سەرپەرشتی پڕۆسەكە دەكات.
تا ئێستا لە هەر چوار بازنەی هەڵبژاردن، 45 كەسی سەربەخۆ خۆیان تۆماركردووە هەروەها دوو پارتی سیاسیی و دوو هاوپەیمانی لیستی ناوی بەربژێرەكانییان پێشكەش بە كۆمیسیۆنی باڵای سەربەخۆی هەڵبژاردنەكانی عێراق كردووە و، ئەمڕۆش دوا مۆڵەت بوو بۆ ئەوەی لیست و ناوی دیكە پێشكەش بە كۆمیسیۆن بكرێت، بەڵام وادەكە درێژكرایەوە بۆ یەكشەممەی داهاتوو.
لە خولی شەشەمی هەڵبژاردنی پەرلەمانی كوردستان - عێراق كە 100 كورسیی پەرلەمانیی هەیە، بەمشێوەیە بەسەر پارێزگاكان دابەشكراوە بەجۆریك 34 كورسی بۆ پارێزگای هەولێر، 38كورسی بۆ پارێزگای سلێمانی، 25 كورسی بۆ پارێزگای دهۆك و سێ كورسیش بۆ پارێزگای هەڵەبجە دەبێت.